.jpg "377351_-selej-2.jpg")
Шабонарӯзи гузашта дар Тоҷикистон бар асари шамоли сахт чандин биноҳо тахриб шуданд, хабар медиҳад Кумитаи ҳолатҳои фавқулодаи ҷумҳурӣ.
Соати 17:33 дақиқаи рӯзи 12 май шамоли сахт як қисмати боми мактаб ва як хонаро дар ноҳияи Рӯшони ВМКБ барканд. Шахсони осебдида ба қайд гирифта нашуданд. Дар ҷойи ҳодиса комиссияи Кумита машғули муайян кардани зиёни расида аст.
Гуфта мешавад, рӯзи панҷшанбе бар асари боришоти зиёд ва болоравии сатҳи об дар дарёҳо ва маҷрои сел 7 қитъаи наздиҳавлигӣ дар маҳаллаҳои Лангар, Хелесон ва Ибод Файзуллоеви ҷамоати Чоркӯҳи шаҳри Исфара зери об монд.
Лойқа 350 метр роҳи селпартои маҳаллаҳои Лангар ва канали Мастчоҳи деҳаи Хоҷаи Аълоро баста, инчунин селҳо ба муваққатан баста шудани роҳи мошингарди маҳаллаи Таги Садаи ҷамоати деҳоти Сурх боис гардид. Айни замон роҳ тоза ва ҳаракати нақлиёт барқарор шуда, лекин корҳои рафъи оқибатҳои офати табиӣ идома доранд.
.jpg)
ИЗОБРАЖЕНИЕ
Дар қаламрави деҳаҳои Хурми, Пули Гирдоб, Гезон, Суҷина, Косатароши ҷамоати Моғиёни шаҳри Панҷакент низ сел омадааст.
“Таҳхонаҳои се манзил дар маҳаллаи Зарафшони деҳаи Суҷина ва ду хонаи сокинон дар деҳаи Чорбоғи ҷамоати деҳоти Косатарошро лойқа пур кард. Талафоти ҷонӣ нест. Ин ҷо ҳам оқибатҳои офати табииро бартараф мекунанд”, – зикр мешавад дар хабари Кумита.
Рӯзҳои истироҳат аз чӣ метавон интизорӣ дошт?
Кумитаи ҳолатҳои фавқулодда бо такя ба маълумоти Агентии обуҳавошиносии ҷумҳурӣсокинонро аз обуҳавои номусоиди рӯзҳои наздик огоҳ мекунад.
Гуфта мешавад, рӯзҳои 14-15-уми май боронҳои пуршиддат, раъду барқ ва жола дар қаламрави кишвар (ба истиснои ВМКБ) метавонанд зиндагиро дар баъзе манотиқ ба мушкил рӯбарӯ сохтаву сатҳи об дар рӯдхонаҳо боло равад.
Имрӯз, 13-уми май ва то рӯзи 16-уми май боронҳо дар маҳалҳои ҷудогонаи баъзе ноҳияҳои кӯҳии вилоятҳои Суғду Хатлон ва ноҳияҳои тобеъи марказ метавонад сабабгори омадани селҳо шаванд.
Боронҳо дар минтақаҳои кӯҳиву наздикӯҳӣ, талу теппаҳо ҳамчунин метавонанд боиси рониши замин, канда шудани садҳои зидди сел, харобии пулҳои мошингузару одамгузар шаванд. Ҳавои номусоид чорвочарониро низ мушкил мекунад.
Болоравии сатҳи оби рӯдхонаҳо ва обхезиву селҳо метавонанд боиси зери об мондани киштзор ва зироатҳои кишоварзӣ гардад.
Дар ин робита Кумитаи ҳолатҳои фавқулодда чун ҳамеша сокинон ва меҳмонони кишварро ҳушдор медиҳад, ки дар чунин рӯзҳо аз сафарҳои безарурат бо роҳҳои кӯҳӣ, рафтан ба шикор, ғунучини ҳезум ва рустаниҳои дорувор, занбӯруғҳо ва ё соҳили кӯлу обанборҳо барои моҳидорӣ худдорӣ кунанд.
Кумита аз мақомоти ҳокимияти давлатии шаҳру ноҳияҳо хоҳиш мекунад ба хотири пешгирӣ аз хатари селҳо сари вақт дар минтақаҳои осебпазир ҳашарҳои умумихалқӣ ташкил кунанд ва ҷӯю каналу селроҳаҳои наздики маҳалҳои истиқоматро аз ҳар гуна сангу сангреза ва хасу хасрӯбаҳо тоза намоянд.
Аз ронандагон хоҳиш мешавад, ки қоидаҳои ҳаракатро ҷиддан риоя намоянд, зеро дар соатҳои боронӣ ҳаракат дар роҳҳо мушкил шуда, боло бурдани суръати ҳаракат ҳамеша хатар дорад.
