Сенати ИМА номзадии Ҷон Хантсманро ба мақоми сафири Амрико дар Русия тасдиқ кард.
Бино ба иттилои сомонаи Бахши хабарии Осиёи Марказӣ, губернатори пешини иёлати Юта, ҷумҳурихоҳ Ҷон Хантсман ҳанӯз дар моҳи март сафир таъйин шуда буд. Кохи сафед то ҳанӯз номзадии ӯро барои дарёфти ризоият ба Сенат намефиристод.
Кохи сафед то кунун мунтазири тасдиқи номзадии вай аз сӯи Москва буд. Тасдиқи дуҷониба аз сафирони нав – сафири Русия дар ИМА Анатолий Антонов ва Ҷон Хантсман дар мулоқоти моҳи июли президенти ИМА Доналд Трамп бо ҳамтои русаш Владимир Путин дар саммити "Бистгонаи бузург" дар Ҳамбурги Олмон сурат гирифт.
Баъдтар дар ҷаласаи Сенат Хантсман сиёсатҳои Москваро яке аз хатарҳои асосӣ дар сиёсати хориҷии ИМА номид. Ба гуфтаи вай, Русия ба таҳдиди амнияту суботи Аврупо, дахолат кардан ба истиқлоли кишварҳои ҳамсояаш идома медиҳад.
Хантсман ҳамчунин гуфт, ки Москва "бидуни шубҳа" дар интихоботи президентии ИМА дар соли 2016 дахолат кардааст. Вай илова кард, омодааст ин масъаларо бо мақомоти Русия баррасӣ кунад. Кремл дахолат дар интихоботро рад мекунад.
Хантсман дар гузашта ИМА-ро дар Сингапур ва Чин сафирӣ мекард. Соли 2012 вай барои курсии президентӣ мубориза бурд. Хонаводаи Хантсман соҳиби корхонаи азими кимиёвӣ аст, ки дар Русия манфиатҳои молӣ дорад.
