Раиси вилояти Суғд Раҷаббой Аҳмадзода ба хонаи яке аз кушташудагони даргириҳои охири марзӣ байни Тоҷикистон ва Қирғизистон рафтааст. Дар ин бора дафтари матбуотии раиси вилояти Суғд хабар медиҳад.
Ба иттилои дафтари матбуот ӯ ба пайвандони сокини деҳаи Хоҷаи Аъло Обидҷон Тӯйчиев, ки дирӯз кушта шуд, аз номи ҳукумати Тоҷикистон изҳори тасаллият намудааст.
«Гуруҳи корӣ гуфтушунид анҷом дода, сабабҳои рух додани вазъ омӯхта мешаванд. Раиси вилоят гуфт, ки дарди дили Шумо сокинони марзӣ дарди дили мо аст», – менависад дафтари матбуоти раиси вилоят.
Ба иттилои манбаъ раиси вилоят зимни мулоқот гуфтааст вазъи баамаломада зери назорати мақомоти ҳифзи ҳуқуқ қарор дорад ва раисҷумҳури Тоҷикистон Эмомалӣ Раҳмон раванди ҳалли масъалаҳои марзиро зери назорати худ гирифта, барои ҳалли саривақтии он мақомоти дахлдорро вазифадор намудааст.
ИЗОБРАЖЕНИЕ Хадамоти матбуоти вилояти Суғд
Ёдовар мешавем, ки шоми 27 январ дар марзи Тоҷикистон ва Қирғизистон даргирии навбатӣ сар зад, ки дар натиҷа 2 сокини Исфара кушта ва ҳудуди 20 тани дигар захмӣ шуданд. Ҷониби Қирғизистон аз захмӣ шудани 11 нафар шаҳрванди худ хабар медиҳад. Тоҷикистон Қирғизистонро барои оғози тирпаронӣ муттаҳам мекунанд, аммо кишвари ҳамсоя моро гунаҳкор медонад.
