Вазорати корҳои хориҷӣ (ВКХ)-и Тоҷикистон бо нашри як изҳорот аз созиши оташбаси дуҳафтаӣ миёни Эрон ва Амрико, ки субҳи имрӯз, 8-уми апрел эълон шуд, истиқбол кардааст.
Ин ниҳод субҳи 8-уми апрел изҳори умедворӣ кардааст, ки музокироти пешбинишуда миёни тарафҳои даргир, ки қарор аст рӯзҳои наздик баргузор шавад, ба сулҳи дарозмуддат ва ҳамаҷониба дар Ховари Миёна оварда мерасонад.
“Боварӣ дорем, ки ин низоъ роҳҳалли низомӣ надорад ва идомаи он танҳо вазъи мураккаби Ховари Миёнаро боз ҳам сангинтар мегардонад ва ба ҳамаи кишварҳои минтақа зарари ҷиддӣ хоҳад расонд”, – гуфта мешавад дар изҳороти ВКХ-и Тоҷикистон.
Тоҷикистон аз тарафҳои даргир хостааст, ки аз истифодаи қувваи низомӣ даст кашида, роҳҳои сиёсӣ-дипломатиро дар асоси меъёрҳои бунёдии ҳуқуқи байналмилалӣ ва Низомномаи СММ ба кор гиранд.
Бояд гуфт, пас аз 39 рӯзи ҷанг дар Ховари Миёна, ки бо ҳамлаи Амрикову Исроил ба Эрон оғоз шуда буд, субҳи имрӯз Вашингтону Теҳрон ба як оташбаси дуҳафтаӣ даст ёфтанд. Бештар дар ин бора дар маводи мо хонед: Амрико ва Эрон бо оташбаси дуҳафтаӣ мувофиқат кардаанд.
