Дар ноҳияи Ёвон ҷасади як кирокаши 38-соларо пайдо кардаанд. Наздикони марҳум мегӯянд, шахсони номаълум ӯро бо 9 зарби корд ба қатл расонида, бо худрави ӯ фирор кардаанд. Ба гуфтаи онҳо, гумонбар, ки як хонандаи мактаб аст, боздошт шудааст. Мақомоти қудратӣ қазияро расман шарҳ намедиҳанд.
Ҷасади Лутфулло Сафаров, сокини ин ноҳияро, ки дар ширкати “3333”-и ноҳияи Ёвон кор мекард, сокинон дар майдони заминҳои кишт рӯзи 4-юми апрел дарёфт кардаанд. Ӯ 38 сол дошт ва соҳиби зан ва чаҳор фарзанди хурдсол буд
Фатҳулло Сафаров, падари Лутфулло Сафаров, рӯзи 6-уми апрел ба “Азия-Плюс” гуфт, ки писараш баъди нисфирӯии 3-юми апрел ба кор баромада, дигар ба хона барнагашт. Соати тақрибан 18 ҳамон рӯз тамос бо ӯ пурра қатъ шудааст.
Ӯ гуфт, “ҳамсараш субҳи рӯзи 4-уми апрел занг зада гуфт, ки писаратон имшаб ба хона наомад”.
“Тақрибан соати 17:30 ба мошини Лутфулло ду кас нишаста гуфтаанд, ки моро ба деҳаи Дастгирак бар. Онҳо нақшаи куштори писарамро доштаанд. Аз ноҳия, тақрибан 6 киллометр болотар, дар як дашт ба узвҳои бадани Лутфулло 9 корд задаанд. Аз пушт ба ӯ ҳамла карда, аз ҷумла се корд аз пушти гарданаш задаанд. Баъд мошинашро гирифта, фирор мекунанд. Пул ва дигар ҳуҷҷатҳояш дар ҷайбаш буданд”, – нақл кард падари Лутфулло.
Фатҳулло Сафаров илова кард, ки ҷасади писарашро як подабон ёфтааст ва ӯ дар бораи қатли писараш, нисфирӯзии 4-уми апрел аз як ҳамкори марҳум шунидааст.
“Ба онҷо рафтам, ки тани беҷони хунолуди Лутфулло дар замин буд. Рӯяшро тоза кардам, либосашро ба рӯяш партофтаму ба Шуъбаи корҳои дохилӣ дар ноҳияи Ёвон хабар додам. Кормандони милитсия ҷасадашро оварданд, аз экспертиза гузаронданд, баъди нисфирӯзӣ ҷасадро доданд. Бегоҳии рӯзи 4-уми апрел ба хок супоридем”,-гуфт Сафаров.
Ин мард бо такя ба иттилои мақомот гуфт, дар пайванд ба ин ҳодиса як кас боздошт шудааст ва ӯ хонандаи яке аз мактабҳои ноҳия мебошад. Вале ӯ бовар надорад, ки ин ин хонанда танҳо даст ба ин кор зада бошад. Мақомот мошини писарашро дар назди хонаи гумонбар ёфтаанд.
“Мақомот гуфтанд, як гумонбарро дар қатли писарам боздошт кардаанд. Ӯ хонандаи синфи 11 дар мактаби деҳаи Дастгирак будааст. Гумонбар гуфтааст, ки танҳо ин қатлро анҷом додааст, аммо вай бача ҳеҷ гоҳ аз уҳдаи ин кор ба танҳоӣ намебарояд. Ин куштор ҳадди аққал кори дасти 2-3 кас аст”, гуфт Сафаров.
Тасдиқи ин гуфтаҳо тавассути манобеи дигар ғайриимкон аст.
Дар ҳамин ҳол, як намояндаи ҳукумати ноҳияи Ёвон рӯзи 7-уми апрел ба “Азия-Плюс” дарёфти ҷасади Сафаровро тасдиқ кард, вале гуфт, ки “то ҳол касеро боздошт накардаанд”.
“Дар пайванд ба ин ҳодиса бисёриҳоро пурсида истодаанд, аммо ҳоло ҳеҷ касро боздошт накардаанд. Ҳоло ягон асос надорем, ки ин куштор аст ё худкушӣ аст. Сохторҳои қудратӣ ин қазияро тафтиш доранд”,-кӯтоҳ гуфт намояндаи ҳукумати ноҳия.
Кӯшишҳои мо барои дарёфти иттилоъ аз мақомоти интизомии ноҳия бенатиҷа анҷомид. Аз шуъбаи корҳои дохилӣ дар ноҳияи Ёвон ба “Азия-Плюс” гуфтанд, дар ин хусус иттилоъ дода наметавонанд.
Фатҳулло Сафаров мегӯяд, то ҳол намедонад ангезаи куштори писараш аз сӯйи афроди ношинос чӣ будааст. Ӯ гуфт, Лутфулло бо касе душманӣ надошт ва бо кирокашӣ рӯзгорро пеш мебурд.
Дар чанд рӯзи охир ин аввалин куштори мармуз дар Тоҷикистон нест, ки расонаӣ мешавад. Шаби 1 ба 2-юми апрел дар шаҳри Кӯлоб ду зани 20 ва 28-сола ва як кӯдаки 6-сола ба таври мармуз кушта шуданд. Мақомот дар пайванд ба куштори се тан алайҳи Валӣ Сафаралӣ, шавҳари яке аз занони кушташуда бо иттиҳоми одамкушӣ парвандаи ҷиноӣ оғоз кардаанд.
Ҷузъиёти бештари ин кушторро дар ин матлаби мо мутолиа кунед: “Мақомот бори аввал ҷузъиёти куштори ду зану як кӯдак дар Кӯлобро шарҳ доданд”.
