Раҳмиддин Саломзода, муовини шаҳрдори Душанбе аз хидматрасонии нақлиёти ҷамъиятӣ боздид ва аз тоза набудани мошинҳо нигаронӣ карда, ба рондандагону масъулин супориш додааст, ки ҳамарӯза нақлиёти худро шӯянду бо мусофирон муносибати хуб кунанд.
Ба иттилои Душанбенақлиётхадамотрасон, дар ҷараёни ин санҷиш, ки рӯзи 6-уми апрел бо иштироки масъулини соҳаи нақлиёт ва тандурустии шаҳрдорӣ сурат гирифтааст, маълум шудааст, ки на ҳамаи ронандагон ва коргоҳҳои нақлиётӣ ба тозагии дохили автобусу микроавтобусҳо аҳамияти зарурӣ медиҳанд.
Саломзода ҳангоми азназаргузаронии хатсайрҳо гуфтааст, ки нақлиёти ҷамъиятӣ дар асл оинаи пойтахт ва муаррифгари маданияти шаҳрдорӣ мебошад.
“…аз ҳар яки мо масъулияти баландро тақозо менамояд, зеро аз рӯи нақлиёт маданияту тозагии шаҳрдорӣ баҳо дода мешавад. Аз ин лиҳоз, моро мебояд дар якҷоягӣ камбудиҳои дар ин самт ҷойдоштаро бартараф намоем”, – гуфтааст Раҳмиддин Саломзода.
Муовини шаҳрдор бо ронандагон суҳбат карда, ба онҳое, ки аз субҳ то ба шом ба сокинону меҳмонони пойтахт хидмат мерасонанд, сипосгузорӣ кардааст. Дар ин баробар, аз онҳо хостааст, ки “ба сокинон ва меҳмонони пойтахт хизматрасонии хубу босифатро пешниҳод намоянд”.
Вай гуфтааст, ки “ронандагонро мебояд, пеш аз ҳама одоби муошират, реҷаи ҳаракат, сару либосӣ тавсияшуда, экипировка (лавозимоту либоси хос, – АП)-и муайянгардида, сабқат накардан, таъмини ҳаракати бонизом ва бехатари воситаҳои нақлиёти мусофирбар ва дигар талаботи мавҷудаи соҳаро қатъиян риоя намоянд”.
Раҳмиддин Саломзода ба масъулини корхонаҳои нақлиётӣ супориш додааст, то камбудиҳои мавҷударо фавран бартараф намуда, шустушӯи ҳамарӯзаи нақлиёт ва одоби муоширати ронандагонро зери назорати доимӣ гиранд.
Бояд гуфт, ки масъалаи тозагӣ ва фарҳанги хидматрасонӣ дар нақлиёти ҷамъиятии пойтахт солҳост мавриди баҳсу интиқоди сокинон қарор дорад. Бо вуҷуди тадбирҳои андешидашуда, то ҳол бархе аз мушкилот пурра ҳал нашудаанд.
Сокинон дар шабакаҳои иҷтимоӣ пайваста аз вазъи дохили автобусу микроавтобусҳо, серодамӣ ва риоя нашудани қоидаҳои санитарӣ шикоят мекунанд. Ба вижа, аз муносибати баду дағалонаи баъзе ронандагон борҳо дар шабакаҳои иҷтимоӣ наворҳо паҳн шуда, вокуниши васеи корбаронро ба бор овардааст. Ғайр аз ин, мусофирони пойтахт нигаронанд, ки баъзе хатсайрҳо, махсусан дар шомгоҳон баъди соати 20:30, фаъол нестанд ё хеле кам мешаванд, ки ин барои сокинон мушкил эҷод мекунад.
