Ширкати “Сool Design” тарҳи Маркази тиҷоратӣ ва савдо, ки дар ҷои бозори пешини “Шоҳмансур”, маъруф ба “Зелёний бозор” сохта мешавад, нашр кард. Яке аз биноҳо 55-ошёна хоҳад буд.
Ин ширкат, ки зоҳиран масъули омода кардани тарҳи ин марказ аст, навиштааст, ғайр аз ширкатҳои тоҷикистонӣ, дар сохтмони ин тарҳ ҳамчунин, ширкатҳои махсус аз Ӯзбекистон, Русия ва Имороти Муттаҳидаи Араб низ иштирок мекунанд.
“Ин маҷмаа дар кӯчаҳои А. Дониш, Н. Муҳаммад, А. Деҳлавӣ, А. Лоҳутӣ (ҷое, ки “Зелёний бозор” ҷойгир буд), А. Адҳамов, Ф. Аттор ва С. Шедрина ҷойгир хоҳад шуд”, – навиштааст ширкат.
Тибқи маълумоте, ки дар низоми ягонаи рақамӣ “memor.pro”-и Сарраёсати меъмории пойтахт нашр шудааст, фармоишгари ин лоиҳа ҶДММ “Тас Интернейшнл Груп” аст.
Дар ин сомона, дар шарҳи номи ширкат гуфта шудааст, ки “То омода шудани ҳуҷҷатҳои иҷозатдиҳанда, бастани шартномаи ҳиссагузорӣ тавсия дода намешавад!” Тибқи иттилои манбаъ, ин ширкат танҳо қарори раиси шаҳри Душанбе оид ба лоиҳакаширо дарёфт кардаасту халос.
Дар асоси ин қарор, дар ин минтақа биноҳои баландошёнаи бисёрфунксионалӣ 28, 31, 35, 40, 55 – ошёнагӣ, биноҳои истиқоматӣ бо марказҳои савдову хидматрасонӣ, утоқҳои нозири минтақавӣ, дармонгоҳи оилавӣ ва таваққуфгоҳи нақлиётии дусатҳа бунёд мешавад.
Инчунин тибқи лоиҳа, дар ин ҷо бунёди мактаб барои 1 ҳазору 200 хонанда, кӯдакистон барои 300 нафар ва таъмиру тачдиди намои берунаи бинои бисёрманзилаи №65-и ноҳияи Шоҳмансур, ки дар шафати ин минтақа аст, дар назар аст.
Корҳои сохтмонӣ кай оғоз мешаванд маълум нест. Як манбаъ аз Сарраёсати меъмории пойтахт ба “Азия-Плюс” гуфт, ки ҳоло корҳои лоиҳакашӣ идома дорад. Тавре мушоҳида кардем, маҳкамкунии гирду атрофи замин ба охир расидааст.
Қаблан, Самӣ Азизиён, сармеъмори шаҳри Душанбе ба “Азия-Плюс” гуфта буд, ки “дар ҷои бозор, ки 30 гектар заминро дарбар мегирад, маҷмаа иборат аз меҳмонхона, маркази савдо ва хизматрасонӣ, бинои маъмурию ҷамъиятиву хидматрасонӣ ва ғайра бунёд мешавад”.
Ӯ он вақт номи ширкати сохтмониро ифшо накарда, танҳо гуфта буд, ки баъди лоиҳакашии иншоот қарори шаҳрдори Душанбе дар бораи сохтмон дода мешавад.
Бояд гуфт, ки ҳашт сол пеш, рӯзи 9-уми октябри соли 2017, бозори маъруф ба “Зелёний бозор” дар пойтахт бо қарори Рустами Эмомалӣ, шаҳрдори Душанбе барҳам дода шуд ва савдогарони он ба бозори “Меҳргон” кӯчиданд.
Ҳамон сол аз шаҳрдории пойтахт ба “Азия-Плюс” гуфтанд, ки дар ҷойи бозор “маркази муосири бисёрсоҳавӣ бо нуқтаҳои фурӯши ҷавобгӯ ба талаботи ҳозира сохта мешавад”. Аммо бо гузашти вақт дар ҷойи бозор ягон иншоот сохта нашуд ва замини он холӣ монда буд.
