Душанбе. 4-уми июл. ОИ «Азия-Плюс» – Ҳизби Халқии Демократии Тоҷикистон (ҲХДТ) ва Ҳизби Сотсиалистии Тоҷикистон (ҲСТ) ба ҷойи вакили рафта дар палатаи поёнии парлумон аз ҳавзаи интихоботии рақами 26-и Қӯрғотеппа номзадҳои худро пешниҳод намуданд.
Аз Комиссия марказии интихоботи (КМИ) ҶТ ба ОИ «Азия-Плюс» хабар доданд, ки ҲХДТ сардори раёсати адлияи вилояти Хатлон Саодат Амиршоеваро номзад пешбарӣ кардааст. Мавсуф шомили ягон ҳизб нест. ҲСТ соҳибкори инфиродӣ Раъно Абдуллоеваро номзад пешбарӣ кардааст.
«Интихобот ба ҷои вакили рафта Асомиддин Саидов, ки сафири Тоҷикистон дар Қирғизистон таъин гашт, дар таърихи 10-уми август баргузор мегардад», – иттилоъ дод манбаъ.
Ба гуфтаи намояндаи КМИ ҶТ, дар ҳавзаи интихоботии номбурда 74 ҳазору 600 нафар сокинони шаҳрҳои Сарбанд, Қӯрғонтеппа ва қисми ноҳияи Бохтор ҳуқуқи овоздиҳӣ доранд.
