Пулиси Душанбе мегӯяд, аз сӯйи мақомоти зертобеаш ду ҳолати фурӯши доруҳои психотропӣ дар пойтахт ошкор шудааст.
Ба навиштаи ин ниҳод, кормандони ШВКД-1 дар ноҳияи Фирдавсӣ ду ҳолати ба фурӯш гузоштани доруи психотропии “Прегабалин” ба истилоҳ “Лирика”-ро ошкор кардаанд.
“Зимни ба фурӯш баровардани чунин дорӯҳои сахттаъсир шаҳрвандон Сайдалиев Ҳадятулло, сокини 24-солаи шаҳри Душанбе ва Юлдошов Муҳаймин, сокини 18-солаи пойтахтро дастгир намуданд. Дар натиҷаи кофтуков аз номбурдагон дар умум 2-ҳазору 745 адад капсулаҳои “Прегабалин” дарёфт ва мусодира карда шуданд”, – навиштааст пулиси пойтахт.
Дар робита ба ҳолати мазкур нисбати номбурдагон тибқи талаботи моддаи 128 КҲМ Ҷумҳурии Тоҷикистон протоколи маъмурӣ тартиб дода шуда, ба ҷавобгарии маъмурӣ ҷалб шудаанд.
Ҳамчунин, пулис аз шаҳрвандон хостааст, ки бо мақсади таъмини солимии ҷомеа ва барои пурра аз байн бурдани ин омили номатлуб ба мақомоти милитсия мусоидат намоянд.
Бояд гуфт, ки “Прегабалин” ва ё “Лирика” доруест, ки таъсири зиддикашиш, зидди изтироб ва дарди шадид буда, он аз ҷониби асабшиносон ва равонпизишкон танҳо пас аз ташхис ва бо дорухат тавсия дода мешавад. Аммо ин навъи доруҳо баъзан аз ҷониби афроде, ки ба моддаҳои гуногуни вобаста ба асаб вобастаанд, харидорӣ мешавад. Он метавонад истифодабарандаро мадҳуш кунад ва ё барои муддате аз ҳолати изтироб берун кунад, аммо бидуни тавсия духтур ва барои муддати дароз истифода кардани он, таъсири манфӣ дорад ва касро муътод мекунад.
