Эмомалӣ Раҳмон, раисҷумҳури кишвар дар Ҳамоиши байналмилалии об дар шаҳри Душанбе гуфт, Тоҷикистон нақша дорад, то соли 2040 “дастрасии аҳолиро ба оби мутамаркази ошомиданӣ ба 90% расонад”.
Ӯ имрӯз, 25-уми май, дар баромади худ илова кард, ки Тоҷикистон ният дорад “то соли 2030 татбиқи пурраи мудирияти ҳамоҳангшудаи захираҳои обро дар сатҳи миллӣ ва ҳавзавӣ таъмин карда, низоми муосири илман асоснок, устувор ва самаранокро таъсис диҳад”.
“Ҳамчунин, Тоҷикистон азм дорад, ки миқёси технологияҳои сарфакунандаи обро беш аз 40 баробар афзоиш дода, истифодаи самараноки онро ба як абзори калидии мутобиқшавӣ ба тағйирёбии иқлим табдил диҳад”, – илова кард раисҷумҳур.
Ӯ, ҳамчунин, изҳор дошт, ҳоло наздик ба 4 миллиард сокини сайера ҳар сол ҳадди ақал як моҳ бо норасоии шадиди об дучор мешаванд ва ин мушкил дар оянда ба таври назаррас афзоиш хоҳад ёфт.
“Тибқи таҳқиқоти нави коршиносон, талаботи ҷаҳон ба оби ошомиданӣ то соли 2050 ҳадди ақал то 25% зиёд мешавад ва ин зарурати истеҳсоли 50% бештари ғизоро барои аҳолии рӯ ба афзоиш тақозо менамояд”, – афзуд Эмомалӣ раҳмон.
Ба қавли ӯ, соҳаҳои нав ва босуръат рушдёбанда, аз ҷумла саноати “сабз”, шаҳрсозӣ, истеҳсоли озуқаворӣ ва инфрасохтори рақамӣ талабот ба обро боз ҳам зиёд хоҳанд кард.
Эмомалӣ Раҳмон дар идома гуфт, ки Тоҷикистон ҷонибдори такмили сохтори Фонди байналмилалии наҷоти баҳри Арал ва дар чорчӯби он таъсис додани Комиссияи байнидавлатии энергетикӣ барои Осиёи Марказӣ аст.
“Ин комиссия метавонад ҳамчун як абзори муҳимми таҳкими ҳамкории минтақавӣ ва таъмини рушди устувори ҳавзаи баҳри Арал хидмат намояд”, – афзуд ӯ.
Эмомалӣ раҳмон гуфтааст, ки Тоҷикистон “бо мақсади пешбурд ва тақвияти дипломатияи об ва муттаҳид кардани талошҳои ҷомеаи ҷаҳонӣ барои ояндаи устувор ва бехатар” Ҷоизаи байналмилалии президенти Тоҷикистонро дар соҳаи обро таъсис додааст.
Ёдовар мешавем, ки 25-уми май дар пойтахти Тоҷикистон Ҳамоиши чоруми байналмилалии об, ки яке аз бузургтарин чорабиниҳои байналмилалии марбут ба масъалаҳои об, иқлим ва рушди устувор аст, оғоз шуд ва то 28-уми май идома мекунад. Дар он масъалаҳои ҷаҳонии марбут ба захираҳои об, тағйирёбии иқлим, обшавии пиряхҳо, дастрасӣ ба оби ошомиданӣ ва ҳамкории байналмилалӣ дар ин самт баррасӣ мешаванд.
Ба иттилои ВКХ Тоҷикистон, дар ҳамоиш беш аз 2500 намоянда аз зиёда аз 100 кишвари ҷаҳон иштирок доранд.
