Як сокини 60 – солаи ноҳияи Ҷаббор Расулов даст ба худкушӣ задааст. Ҳодиса тақрибан соати 2:00 шаби 23 ба 24-уми май дар ҷамоати Ғулакандози ин ноҳия рӯх додааст.
Аз Додситонии ноҳияи Ҷаббор Расулов ва Раёсати ВКД дар вилояти Суғд, худкушии ин мардро тасдиқ карданд, вале аз ӯ ном набурданд. Ҳамин тариқ, онҳо дар бораи ҳодиса ҷузъиёт надоданд.
Дар ҳамин ҳол, як манбаъ аз ҳукумати ноҳияи Ҷаббор Расулов бо тасдиқи ин ҳодиса, аз ин мард Баҳодур Абдуазизов, сокини 60 – солаи кӯчаи Дусматови ҷамоати деҳоти Ғулакандози ноҳия ном бурд. Манбаъи мо гуфт, Абдуазизов “дар саҳни ҳавлӣ бо корди хоҷагӣ раги гарданашро буридааст”.
Сабаби даст ба чунин кор задани мард ҳоло маълум нест. Аз додситонии ноҳия гуфтанд, ҳодисаро таҳқиқ доранд.
Ба иттилои ҳамсуҳбати мо аз ҳукумати ноҳия, мард 4 фарзанд – се писар ва як духтар дошт. Ҷасадаи Абдуазизовро имрӯз, 25-уми май дар оромгоҳи зодгоҳаш ба хок супурдаанд.
Ҳамасола дар вилояти Суғд даҳҳо ҳодисаи худкушӣ расонаӣ мешавад, ки бештар бо роҳи худовезӣ ва худро дар об ғарқ кардан ҷон медиҳанд. Аз ҷумла, як моҳ пеш, 17-уми апрел духтари 13 – сола дар ҷамоати деҳоти Дадобой Холматови ноҳияи Бобоҷон Ғафуров даст ба худкушӣ зада буд. Сабаби даст ба худкушӣ задани ӯ то ҳол барои расонаҳо маълум нест.
Ёдовар мешавем, ки тибқи иттилои Кумитаи кор бо занон ва оила, соли гузашта дар Тоҷикистон 364 ҳолати худкушӣ ва сӯқасд ба он ба қайд гирифта шудааст, ки назар ба соли 2024-ум (316 ҳолат) 48 ҳолат бештар аст. Аз ин рақам 254 (соли 2024 – 217) ҳолат худкушӣ ва 110 (соли 2024 – 99) ҳолати дигар сӯиқасд ба ҷони худ будааст.
