Душанбе. 7-уми октябр. ОИ «Азия-Плюс» – Имрӯз дар шаҳри Душанбе семинари ҷумҳуриявии «Нақши татбиқи лоиҳаҳои тандурустии ҷамоавӣ ва заминавӣ дар ислоҳоти соҳаи тандурустӣ» ба кор шурӯъ кард.
Аз Вазорати тандурустии ҷумҳурӣ ба ОИ «Азия-Плюс» хабар доданд, ки дар кори семинар кормандони дастгоҳи марказии вазорати тандурустӣ, намояндагони раёсатҳои тандурустии вилоят, роҳбарони беморхонаҳои марказӣ ва муассисаҳои тиббии расонидани кӯмаки аввалияи тиббии ноҳияҳои озмоишӣ, ки лоиҳаҳои тандурустии ҷамоавӣ ва заминавӣ дар он ҷо амалӣ мегарданд, иштирок мекунанд.
Ба иттилои манбаъ, дар семинар инчунин масоили расидан ба аҳдофи роҳандозии фаъолияти соҳаи тандурустӣ, нақши татбиқи амалии лоиҳаҳои тандурустии ҷамоавӣ ва заминавӣ, низоми иттилоотӣ чун қисми муҳими ислоҳоти хоҷагиву молиявӣ, молиягузории фардии табобати беморон, барқарорсозӣ ва таҷдиди муассисаҳои тиббӣ ва роҳҳои бартараф сохтани мушкилоти мавҷудаи пизишкони оилавӣ низ мавриди муҳокима қарор хоҳанд гирифт.
