Дар мусоҳиба бо хабарнигори ОИ «Азия-Плюс» муовини аввали раиси ҲНИТ, вакили палатаи поёнии парлумон Саидумар Ҳусайни изҳор кард, ки намояндагони ҳизб дар парлумон баҳри қабули тағийрот ба Қонуни ҶТ «Дар бораи интихобот» дар чаҳорчӯби қонунгузорӣ аз тамоми имконоти мавҷуда истифода хоҳанд кард.
«Шояд шаклу ва шумори ислоҳи аз ҷониби мо пешниҳодшуда каме тағйир ёбанд, вале мо аз тамоми имконотамон истифода мекунем, то ки онҳо қабул шаванд, зеро мо ба хубӣ мефаҳмем, ки ин тақозои замон аст», – гуфт вай.
Вакили парлумон аз ҲНИТ дар ин робита таъкид дошт, ки аз ҷараёни баррасии тағийроти пешниҳодшуда дар кумитаву комиссияҳои соҳавӣ дар парлумон қаноатманд нест, зеро «агар сухан сари дигар масоил, аз қабили афзоиши тарофаҳои нархи истифодаи барқ ё пардохти маблағ барои роҳ равад, намояндагони ҲХДТ аз меъёрҳои ҷаҳонӣ сухан мегӯянд, вале чун сухан сари демократикунони ҷомеа бошад, аз муддати зиёд лозим будан барои он ва ба инобат гирифтани менталитети мардуми мо ҳарф мезананд».
Дар идома Ҳусайнӣ зикр кард, ки дар ҷараёни баррасии тағйироти мазкур вакили парлумон аз ҲХДТ Давлаталӣ Давлатзода зикр кардааст, ки бо супориши президент тамоми санадҳои қонунгузорӣ, ки дар мувофиқа бо Комиссияи оштии миллӣ қабул шудаанд, набояд тағийр ёбанд.
«Он замон ман ба ӯ посух дода будам, ки пас чаро ҳукумати Тоҷикистон пас аз расидан ба сулҳ якҷониба бидуни мувофиқа бо собиқ Комиссияи оштии миллӣ тағийрот ба Конститутсияро ба раъйдиҳии умумихалқӣ гузошт», – афзуд номбурда.
Ёдрас мекунем, ки дар ҷаласаи Шӯрои Маҷлиси намояндагони Маҷлиси Олии ҶТ таҳти раёсати раиси палатаи поёнии парлумони ҷумҳурӣ Шукурҷон Зуҳуров санаи 21-уми январи соли равон тағйироти пешниҳодшуда аз ҷониби Ҳизби наҳзати исломии Тоҷикистон ба қонун «Дар бораи интихоботи президенти Тоҷикистон»
рад карда шуд.
Дар ҳамин ҳол, чанде қабл дар мусоҳиба бо хабарнигори ОИ «Азия-Плюс» вакили парлумон, раиси Ҳизби коммунисти Тоҷикистон Шодӣ Шабдолов эҳтимоли аз ҷониби коммунистон дастгирӣ шудани ин лоиҳаро изҳор карда буд.
