Зимни як амалиёти махсуси муваффақонаи Кумитаи давлатии амнияти миллии ҷумҳурӣ беш аз 138 кило маводи мухаддир мусодира гардида, 10 нафар боздошт шуданд, ки миёни онҳо намояндагони мақомоти ҳифзи ҳуқуқ ва хадамоти марзбонӣ ҳузур доранд.
Тавре ба ОИ «Азия-Плюс» аз КДАМ ҶТ хабар доданд, амалиёт дар ду марҳила – дар ағбаи кӯҳии воқеъ дар вилояти Суғд бо мусодираи ҳудуди 45 кило героин аз автомашина ва дар Душанбе бо мусодираи 94 кило маводи нашъаовари ҳашиш аз гараж сурат гирифтааст.
Гуфта мешавад, дар ҷараёни амалиёт ҳамчунин рақамҳои автомашинаи мутааллиқ ба кишвари ҳамсояи Қирғизистон низ дарёфт шудаанд, ки аз нақшаҳои минбаъдаи қочоқбарон гувоҳӣ медиҳанд.
«Вобаста ба ин ҳодиса 10 нафар шаҳрвандони Тоҷикистон, аз ҷумла корманди фаврии ваколатдори Раёсати кофтукови ҷиноятии ШВКД ҶТ дар ноҳияи Сино-1, капитани милиса Ҷамшед Сафаров, ду нафар хизматчии қисми низомии 2610-и Сарраёсати нерӯҳои марзбонӣ Зайниддин Аҳмадов ва Тоҷиддин Бердиев, собиқ корманди КДАМ ҶТ Раҳим Иброҳимов ва боқимонда шаҳрвандони мулкӣ боздошт гардиданд», – гуфтанд дар КДАМ.
Зимнан зикр гардид, ки аз рӯи ин далелҳо дар Раёсати КДАМ дар вилояти Суғд парвандаи ҷиноӣ боз шуда, тафтишот идома дорад.
