Аз ин ба баъд мақомоти расмии Тоҷикистон худдорӣ варзидан аз интишори маълумот дар бораи ҳаҷми интиқоли маблағҳои муҳоҷирони кориро афзал медонанд.
«Ман доир ба маблағҳои муҳоҷирон чизе гуфтанӣ нестам, зеро ин масъала метавонад ангезаи сиёсӣ касб кунад», – гуфт зимни нишасти матбуотии рӯзи 23-юми июл раиси Бонки миллии Тоҷикистон Абдуҷаббор Ширинов.
Ба гуфтаи ӯ, на ҳама воситаҳои ба ҷумҳурӣ инқолшуда аз ҷониби шахсони хусусӣ ба муҳоҷирони корӣ мансубанд. «Тибқи маълумоти таҳқиқоти Бонки миллӣ, ҳадди ақал 30-35%-и воситаҳо аз ҳисоби содироти хурд ба ҷумҳурӣ ворид мешаванд», – иброз дошт вай.
Шурӯъ аз моҳи майи соли ҷорӣ Вазорати рушди иқтисод ва савдои ҶТ аз интишори маълумот дар бораи ҳаҷми интиқоли маблағҳои пулии муҳоҷирон даст кашид, ки дар гузориши «Мониторинг ва огоҳии барвақтӣ дар Тоҷикистон» дарҷ мешуданд.
Тибқи маълумоти гузориши мазкур, моҳи январи соли ҷорӣ ҳаҷми интиқоли маблағҳои пулии шахсони воқеъӣ ба Тоҷикистон 178,8 млн., моҳи феврал – 180,3 млн., март – 221,8 млн. ва апрел – 267,6 млн. доллари ИМА-ро ташкил додааст.
Ҳамин тариқ, дар 4 моҳи соли равон ба ҷумҳурӣ ҳудуди 848,5 млн. доллари ИМА маблағи пулӣ ворид гардидааст, ки нисбат ба ҳамин давраи соли гузашта қариб 9,5% зиёдтар аст. Аз рӯйи натиҷаҳои соли 2012 ҳаҷми интиқоли маблағҳои пулӣ ба Тоҷикистон 3 млрд. 595,2 млн. доллари ИМА-ро ташкил додааст.
