Оҷонсии бокортаъминкунӣ дар хориҷаи Тоҷикистон ба сокинони кишвар ҳушдор додааст, ки ба даъвату пешниҳоди кор дар шабакаҳои иҷтимоӣ бовар накунанд.
Ин ниҳод дар пайи афзудани мавридҳои қаллобӣ тариқи шабакаҳои иҷтимоӣ ва паёмрасонҳо гуфтааст, ки қаллобон бо “пешниҳоди маош ва ҷойи кори хуб дар хориҷа, дарёфтии сарии раводид” сокинони кишварро фиреб медиҳанд.
“Ҳадафи асосии ин нафарон танҳо ба даст овардани маблағи шумост. Дар натиҷа, шаҳрвандон на танҳо маблағ, балки ҳуҷҷат ва маълумотҳои шахсии худро низ аз даст медиҳанд”,-навиштааст оҷонсӣ.
Оҷонсӣ ба сокинон тавсия додааст, ки ба миёнаравҳо ва эълонҳое, ки дар саҳифаҳои шубҳанок пешниҳод шудаанд, бовар накунанд, маълумоти шахсӣ аз ҷумла, нусхаи шиноснома ва дигар ҳуҷҷатҳояшонро нафиристанд.
Ин ниҳод аз шаҳрвандон хостааст, дар ҳолати дучор шудан бо ҳолатҳои қаллобӣ ва шубҳанок дар мавриди пешниҳоди кор дар хориҷа бо рақамҳои +992 930 934 994, +992 55 555 1080, ба Оҷонсии бокортаъминкунӣ дар хориҷа, муроҷиат кунанд.
Инчунин тариқи ин рақамҳо ба шуъбаҳои ин ниҳод дар минтақаҳо дар тамос шаванд:
- – вилояти Суғд: +992 92 609 0909, +992 93 999 0909, +992 88 440 6633, +992 90 630 6633
- – вилояти Хатлон: +992 905 800 063, +93 487 8828, +992 91 811 2288
- – ВМКБ: +992 935 101 439
Бояд гуфт, пас аз эҷоди монеаҳои зиёд барои кор ва муносибати хашини мақомот дар Русия, ки самти аслии муҳоҷират барои шаҳрвандони Тоҷикистон аст, сокинон барои муҳоҷирати корӣ ба кишварҳои ғарбӣ, аз ҷумла Британияи Кабир, Литвия ва Корея таваҷҷуҳи бештар доранд.
Аммо сафар ба ин кишварҳо, ки ҳақи бештар барои кор пардохт мекунанд, барои ҳама дастрас нест ва танҳо тавассути имтиҳону номнависи пешакӣ фиристода мешаванд. Аз ин лиҳоз, сокинон барои гузаштан аз имтиҳон ва номнавис, ба миёнаравҳо пул медиҳанд ва дар аксар ҳолат, фиреб мехуранд.
Пештар, Созмони байналмилалии муҳоҷират (СБМ) ба сокинони Тоҷикистон ҳушдор дод, ки ба ҳамаи эълонҳои кор дар Британия, аз ҷумла ба даъвату пешниҳоди кор, ки тариқи паёмрасони “WhatsApp” ё “Telegram” фиристода мешаванд, бовар накунанд. Ба гуфтаи ин созмон, “корфармоёни воқеӣ ҳеҷ гоҳ барои муошират аз паёмрасонҳо истифода намебаранд”.
