Раиси Ҳизби сотсиал-демократии Тоҷикистон Раҳматилло Зойиров аз тамоми ҷонибдоронаш даъват ба амал овард, ки дар маъракаи интихоботи президентӣ атрофи номзади ягона аз Иттиҳоди нерӯҳои ислоҳотхоҳи Тоҷикистон (ИНИТ) Ойниҳол Бобоназарова муттаҳид шаванд.
Раҳматилло Зойиров дар изҳороти худ дар ин робита қайд мекунад, ки маъракаи интихоботи президентӣ рӯйдоди муҳиму пурмасъулият ва ҳамзамон тақдирсоз дар таърихи муосир буда, дархост мекунад, ки аз ранҷишу ҳақ будан ё набудани касеву чизе мебояд даст кашид ва ҳатто хатогиҳои кӯчакеро ҳам мебояд сарфи назар кард, зеро дар акси ҳол, «моро лозим меояд, ки муддати зиёде бо онҳо сарукор дошта бошем».
«Мо имрӯз ба сифати номазади ягона аз ИНИТ Ойниҳол Бобоназароваро пешбарӣ намудем. Восита ва имконоти мухолифон ё ҷонибдоронро муқоиса намекунем, балки ба дастгирии номзадии ӯ аз ИНИТ, нахустин зани тоҷик ба мансаби президентӣ гирдиҳам меоем», – даъват мекунад Зойиров.
Ба гуфтаи ӯ, минбаъд эҳсосот хомӯш шуда, вақт довари замон хоҳад буд. «Вале вазифаи имрӯзаи мо ҷудоӣ наандохтан аст ва баҳри ноил гардидан ба он мо ба пеш равонаем, гузаштҳо мекунем ва ман номзадиамро барои боз ҳам қавитар шудан, мубориза бурдан баҳри исботи доштани ҳуқуқ ба зиндагии шоиста – озодонаву бидуни ҳарос ва эҳтиром гузоштан ба ҳуқуқҳои ҳамдигар бозпас гирифтам», – изҳор доштааст Зойиров.
Ӯ аз ҷонибдорони худ, аз ҷумла аъзои ҲСДТ, ҳамчунин Ҷунбиши миллии Тоҷикистон, Гурӯҳи 24, Ҳаракати миллии «Ватандор», фаъолони шабакаҳои иҷтимоӣ ва бахши ҷомеаи шаҳрвандӣ даъват кард, ки мухолифатро як сӯ гузошта, аз номзади ягонаи ИНИТ Ойниҳол Бобоназарова пуштибонӣ намоянд.
Қобили зикр аст, ки Иттиҳоди нерӯҳои ислоҳотхоҳи Тоҷикистон ба сифати номзади ягона аз Иттиҳод ба мансаби президентӣ ҳуқуқшиноси маъруф Ойниҳол Бобоназароваро пешбарӣ кард.
