Дар маркази «Ёқут-2000»-и шаҳри Душанбе Фестивали байнулмилалии хайриявии хӯроку таомҳои миллӣ ҷараён дорад, ки бо ташаббуси Вазорати корҳои хориҷии ҶТ, Маҳфили сафирони Душанбе ва Маҳфили иҷтимоии Душанбе созмон дода шуд.
Ҳайати корпусҳои дипломатӣ, намояндагони созмонҳои байнулмилалӣ ва дигар созмонҳои хориҷии муқими шаҳри Душанбе дар чорабинии мазкур иштирок доранд.
Дар фестивал таому хӯрокҳои маъмулии миллии сокинони Чин, Ҷопон, Украина, Русия, Қатар, Қазоқистон, Қирғизистон, Олмон, Арабистони Саъудӣ, Эрон ва Покистон ба маърази тамошо гузошта шудаанд.
Тамошогарони фестивал муддати тамоми рӯз имкон доранд, ки бо нархҳои дастрас аз таому хӯрокҳои миллии халқҳои гуногуни ҷаҳон тановул намоянд. Ба қавли созмондиҳандагони фестивал, маблағе, ки аз ин чорабинӣ ба даст меояд, барои кӯмаки ятимхонаҳо сарф карда мешавад.
