– Вақте варақаҳои интихоботӣ дар нашриёти ба Дастгоҳи иҷроияи президенти мамлакат зертобеъи «Шарқи озод» ба чоп мерасанд, дар бораи демокративу шаффоф будани интихобот ҳарф задан ҳадди ақал соддалавҳонаву хандаовар аст, – иброз дошт дар мусоҳиба ба хабарнигори ОИ «Азия-Плюс» роҳбари ситоди пешазинтихоботии номзад ба мансаби президентӣ аз ҲНИТ Ойниҳол Бобоназарова, муовини раиси ҲНИТ Маҳмадалии Ҳайит.
Ба гуфтаи ӯ, таҷрибаи чопи варақаҳои интихоботӣ дар маъракаи интихоботи парлумонии соли 2010 дар нашриёти «Шарқи озод» нишон дод, ки ҷараёни чоп бидуни назорати аҳзоби сиёсӣ, аҳли ҷомеа ва танҳо таҳти назорати мақомоти давлатӣ сурат гирифт.
«Тасаввур намоед, дар «Шарқи озод» варақаҳоро бидуни ҳама гуна назорат чоп карданд ва ҳеҷ касе огаҳӣ надорад, ки маводи заминавии он нест шудааст ё на ва ё оё шумори бештари ин варақаҳо ба чоп нарасидааст», – зикк кард Ҳайит.
Дар идома номбурда таъкид дошт, ки нашри варақаҳои интихоботӣ дар хориҷи кишвар мувофиқи мақсад буда, агар он аз ҷиҳати моддӣ серхароҷот бошад, метавон онро дар нашриёти хусусии дохили ҷумҳурӣ ба чоп расонид ва ин ҳам дар ҳолест, ки заминаи моддиву техникии чанде аз нашриёти хусусӣ аз «Шарқи озод» хеле хубтар аст.
Ӯ ҳамчунин иттилоъ дод, ки то имрӯз раисони беш аз 20 шаҳру навоҳӣ бо баҳонаҳои гуногун ба ҷамъоварии имзоҳо ба ҷонибдории номзад О.Бобоназарова монеъаҳо эҷод мекунанд.
«Раиси ноҳияи Хуросони вилояти Хатлон изҳор намуд, ки вобаста ба шумори аъзои ҲНИТ дар ноҳия ба ҳамин шумор варақаҳои ҷамъоварии имзоҳоро тасдиқ мекунад», – афзуд М.Ҳайит.
