Шабакаи аввали телевизиони Тоҷикистон барномаи муфассалеро дар бораи боздошти аъзои гурӯҳи террористӣ дар Душанбе ахири ҳафтаи гузашта намоиш доданист. Сюжети телевизионӣ дар ин бора имрӯз, 24-уми сентябр соати 20:00 бо вақти маҳаллӣ пахш мегардад.
Қаблан дар сомонаи расмии ВКД ҶТ иттилоъ дода шуда буд, ки ин барнома шоми рӯзи 23-юми сентябр намоиш дода мешавад, вале бо сабабҳои номаълум намоиши он ба имрӯз гузаронида шуд.
Гурӯҳи террористони ахири ҳафтаи гузашта дар шаҳри Душанбе боздоштшуда, роҳандозии таркишҳо дар назди чор дарвозаи пойтахт, як қатор биноҳои мақомоти корҳои дохилӣ, Кумитаи давлатии амнияти миллӣ ва дигар иншооти давлатиро тарҳрезӣ намуда буданд.
Бино ба маълумоти мақомот, гурӯҳро сокини ҷамоати Чоргултеппаи ноҳияи Рӯдакӣ Алимурод Маханови 29-сола бо лақаби «устод» роҳбарӣ мекардааст, ки дар яке аз лагерҳои ҷангиёни Ҳаракати исломии Ӯзбекистон дар Покистон таълими ҳарбӣ гирифтааст.
«Айни замон 10 нафар аз аъзои фаъоли гурӯҳи террористии мазкур боздошт ва аз онҳо таппончаҳо, адабиёти таблиғотӣ, нақшаҳои иншоот барои тарконидан ва ғайра дарёфту мусодира гардида, ҷустуҷӯи чанде аз аъзои он эълон шуд», – гуфта буд манбаъ.
