Бо қарори Комиссияи марказии интихобот ва раъйпурсӣ (КМИР)-и Тоҷикистон пас аз расман бақайдгирри номзадҳо ба мансаби президентӣ, онҳо ба суханронии 30-дақиқаинаи ройгон дар ҳар кадоме аз шабакаҳои давлатии телевизионӣ ҳуқуқ пайдо мекунанд.
Тавре ба ОИ «Азия-Плюс» роҳбари маъмурияти КМИР Абдуманнон Додоев хабар дод, ба шахсони бовариноки номзадҳо низ дар ҳар кадоме аз шабакаҳои давлатии телевизионӣ 20 дақиқа эфир дода мешавад.
Ба гуфтаи ӯ, ҳамчунин номзадҳо ҳуқуқ доранд, ки дар матбуотӣ расмӣ маълумот дар бораи барномаҳои пешазинихоботии худ дар ҳаҷми 10 саҳифаи чопӣ (шрифти 14)-ро низ ба нашр расонанд.
Додоев зикр кард, ки айни замон КМИР масъалаи тартиби пахши ройгони роликҳои рекламавии номзадҳо дар шабакаи давлатиро мавриди баррасӣ қарор дорад.
Дар ҳамин ҳол ӯ, зикр кард, ки бо номбар кардани номзадҳои пешбаришуда ба сифати номзад ба мансаби президентӣ, имрӯз баъзе аз ВАО ба иштибоҳ роҳ медиҳанд. «Танҳо пас аз пешниҳоди рӯйхати 210 ҳазор имзои интихобкунандагон ба ҷонибдории худ ва гирифтани шаҳодатномаи дахлдор, онҳоро метавон номзад ба мансаби президентӣ номид», – иброз дошт ӯ.
Ӯ хотирррасон намуд, ки ҷраёни ҷамъоварии имзоҳо ба ҷонибдории номзадҳо то 7-уми октябр идома ёфта, сипас бақайдгирии расмии онҳо ва марҳилаи таблиғоти пешазинтихоботӣ оғоз мегардад.
Намояндаи КМИР ҳамчунин ахбори бархе аз ВАО дар бораи номзади ягона аз Иттиҳоди нерӯҳои ислоҳотхоҳи Тоҷикистон (ИНИТ) будани О.Бобоназароваро хато унвон кард. «ИНИТ субъекти ваколатдории пешбарии номзад ба мансаби президентӣ маҳсуб намеёбад ва имрӯз О.Бобоназарова номзади танҳо аз ҲНИТ пешбаришуда аст», – таъкид дошт намояндаи КМИР ҶТ.
Ёдрас мекунем, ки қаблан Ҳизби сотсиал-демократии Тоҷикистон (ҲСДТ) низ изҳор дошта буд, ки аз номзадии О.Бобоназарова дастгирӣ хоҳад кард. Анҷумани пешазинтихоботии ҲСДТ ба рӯзи 6-уми октябр, як рӯз қабл аз анҷоми маъракаи ҷамъоварии имзоҳо ба ҷонибдории номазадҳо таъин шудааст.
Ҳизби халқии демократии Тоҷикистон (ҲХДТ) номзади худ ба мансаби президентиро дар анҷумани пешазинтихоботиаш рӯзи 4-уми октябр дар Душанбе пешбарӣ менамояд.
Ҳамин тариқ, то имрӯз шаш ҳизби сиёсӣ ва ҳамчунин Иттифоқи ҷавонони Тоҷикистон ва Федератсияи иттифоқҳои касабаи мустақили Тоҷикистон номзадҳои худ ба мансаби президентиро пешбарӣ намуданд. Аз ҲКТ Исмоил Талбаков, аз Иттифоқи ҷавонон ва Итифоқҳои касабаи Тоҷикистон президенти амалкунанда Эмомалӣ Раҳмон, аз Ҳизби ислоҳоти иқтисодӣ раиси ҳизб Олимҷон Бобоев, аз Ҳизби сотсиалистӣ раиси он Абдуҳалим Ғаффоров, аз Ҳизби аграрӣ академик Толиббек Бухориев, аз Ҳизби демократ раиси он Саидҷаъфар Исмонов ва аз Ҳизби наҳзати исломии Тоҷикистон Ойниҳол Бобоназарова номзад ба мансаби президентӣ дар интихоботи қарибулвуқӯъ пешбарӣ шуданд.
Санаи интихоботи президентӣ дар Тоҷикистон ба рӯзи 6-уми ноябр таъин шудааст.
