Аз ҳисоби оғози таҳвил аз Русия ҳаҷми воридоти гази моеъ ба Тоҷикистон афзуд.
Тавре ба ОИ «Азия-Плюс» аз Вазорати энергетика ва саноати ҶТ хабар доданд, дар зарфи 8 моҳи соли ҷорӣ ба Тоҷикистон 153,9 ҳазор тонна гази моеъ ворид карда шудааст, ки нисбат ба ҳаминдавраи соли гузашта 96 ҳазор тонна зиёдтар аст.
«Қаблан агар гази моеъ танҳо аз Қазоқистон ворид мешуд, шурӯъ аз моҳи июли соли равон воридоти ин навъи сӯзишвории автомобилӣ аз Русия низ оғоз гардида, ҳиссаи таҳвили гази моеъ аз Русия дар ҳаҷми умумии воридот 14,7 ҳазор тоннаро ташкил дод», – гуфтанд дар вазорат.
Ба иттилои манбаъ, арзиши гази моеъи воридшуда аз Қазоқистон 588 доллари ИМА барои 1 тонна ва аз Русия 813 доллари ИМА барои 1 тоннаро ташкил медиҳад.
«Бо назардошти беш аз ним баробар зиёд шудани ҳаҷми воридот, метавон гуфт, ки истифодаи гази моеъ дар ҳоли афзоиш аст, зеро нисбат ба бензин он хеле арзонтар буда, ин ҳам дар ҳолест, ки воридоти бензин дар зарфи 8 моҳ аз 109,9 ҳазор тоннаи соли гузашта то 85,7 ҳазор тонна кам гардид. Шояд имрӯз 50%-и нақлиёти автомобилӣ дар Тоҷикистон ба сифати сӯзишворӣ гази моеъро истифода мекунанд», – гуфт манбаъ.
Қобили зикр аст, ки имрӯз дар нуқтаҳои фурӯши сӯзишвории Тоҷикистон арзиши гази моеъ нисбат ба бензин ду баробар поинтар буда, нархи 1 литр гази моеъ ба 3 сомонӣ баробар аст.
