Президенти Туркманистон Гурбонгулӣ Бердимуҳаммедов дар бораи қабули шаҳрвандони хориҷӣ ба таҳсил дар мактабҳои олии Туркманистон дар соли хониши 2014-2015 фармон ба имзо расонид.
Бино ба маълумоти торнамои Turkmenistan.ru, мутобиқи ин санад, ба Вазорати маорифи Туркманистон дастур дода шудааст, ки ба курсҳои яксолаи омӯзиши забони туркманӣ дар Донишкадаи давлатии омӯзгории ин кишвар таври ройгон 30 нафар шаҳрвандони Афғонистон қабул карда шаванд.
«Ҳамчунин барои таҳсил тариқи ройгон дар муассисаҳои таълимии Туркманистон 10 шаҳрванди Тоҷикистон, 4 шаҳрванди Чин ва 1 шаҳрванди Эрон низ қабул мешаванд. Боз ду шаҳрванди Афғонистон дар Туркманистон пулакӣ таҳсил мекунанд», – зикр мегардад дар маълумот.
Гуфта мешавад, дар доираи иҷрои фармони мазкур Гурбонгулӣ Бердимуҳаммедов ба роҳаброни вазорату идораҳои дахлдор дастур додааст, ки таҷрибаи қабули шаҳрвандони хориҷӣ барои таҳсил дар муассисаҳои таълимии кишварро густариш дода, таъмини шароити мусоиди будубош ва таҳсили онҳоро таҳти назорат гиранд.
