Бо супориши сафоратхонаи Тоҷикистон дар Русия, рӯзи шанбеи ҳафтаи сипаришуда кормандони намояндагии Вазорати меҳнат, муҳоҷират ва шуғли аҳолии ҶТ дар Русия ва Хадамоти консулгарии Тоҷикистон бо мақсади ошкор намудани ҳолатҳои ҷараёни тафтиши
марги шаҳрванди Тоҷикистон
Фаррух Ӯрозов ба шаҳри Солнечногорски вилояти Маскав раҳсипор шуданд.
Котиби матбуотии намояндагии Хадамоти муҳоҷирати ҶТ дар Русия Иброҳим Аҳмадов ба «Азия-Плюс» дар ин робита иттилоъ дод, ки зимни вохӯрӣ бо намояндаи Сарраёсати Кумитаи тафтишот дар вилояти Маскав Тимур Николенко маълум шудааст, ки аз рӯи далели марги Ф.Ӯрозов парвандаи ҷиноӣ боз шуда тафтишот идома дорад.
«Ба гуфтаи Т.Николенко, мақомоти тафтишот тамоми ҳолатҳои парвандаро воқеъбинона ва саҳеҳу дақиқ мавриди таҳқиқ қарор дода, ҳама ташхисхои зарурии судиву тиббӣ гузаронида шудааст», – иброз дошт котиби матбуотӣ.
Дар ҳамин ҳол, рӯзи ҷумъаи ҳафтаи сипаришуда ҷасади Фаррух Ӯрозов тариқи хатсайри шомгоҳии ҳапвоӣ ба ватан интиқол дода шудааст.
