Рӯзи 20-уми сентябр вохӯрии вазири корҳои дохилии Тоҷикистон, генерал-лейтенанти милитсия Рамазон Раҳимзода бо муовини вазири бехатарии ҷамъиятии Ҷумҳурии Халқии Хитой Ли Вэй доир гардид.
Бино ба маълумоти маркази матбуоти ВКД ҶТ, зимни мулоқотт тарафҳо масоили мубориза бар зидди ҷинояткорӣ, аз қабили терроризм, экстремизм, сепаратизм, гардиши ғайриқонунии маводи мухаддир ва силоҳро мавриди баррасӣ қарор доданд.
Ба иттилои манбаъ, ҳамчунин оид ба амалисозии Ёддошти тафоҳум оид ба ҳамкорӣ байни Вазорати корҳои дохилии Тоҷикистон ва Вазорати бехатарии ҷамъиятии Ҷумҳурии Халқии Хитой дар самти муқовимат бар зидди терроризм, экстремизм ва сепаратизм табодули афкор сурат гирифт.
Зимнан зикр мегардад, ки дар доираи ҳамкориҳои дуҷониба дар Тоҷикистон гузаронидани машқҳои муштараки низомӣ-тактикӣ дар шароити кӯҳсор мавриди муҳокима қарор дода шуд.
