Зимни нишасти хабарӣ дар Душанбе вазири рушди иқтисод ва савдои ҶТ Шариф Раҳимзода изҳор намуд, ки нақшаи чорабиниҳо бобати то ба ҳадди камтарини ниҳоӣ овардани хатарҳои буҳрони ҷаҳонии иқтисодиву молӣ ба иқтисоди Тоҷикистон дар марҳилаи баимзорасӣ қарор дорад.
Ба гуфтаи вазир, ҳуҷҷати мазкур аз ҷониби Вазорати рушди иқтисод ва савдои ҷумҳурӣ дар ҳамдастӣ бо вазорату идораҳои дахлдори кишвар таҳия шуда, бо тамоми мақомоти дахлдор мувофиқа ва ояндаи наздик ба нашр хоҳад расид.
«Дар ин нақша дар навбати аввал роҳандозии сиёсати пуливу қарзии дурусту саҳеҳ, сиёсати бештар эҳтиёткоронаи андозу буҷетӣ (фискалӣ), коҳиши хароҷот ва фароҳам овардани ҷойҳои нави корӣ пешбинӣ шудааст», – иброз дошт ӯ.
Ба қавли Раҳимзода, нақшаи мазкур аз 5 қисмат иборат аст, ки се навъи имконпазири сурат гирифтани вазъ (сенария)-и рушди иқтисоди ҷумҳурӣ дар шароити буҳрони ҷаҳонии иқтисодиву молиро дар бар мегиранд.
Ӯ қайд кард, ки соли 2015 афзоиши иқтисоди Тоҷикистон тибқи пешгӯии нохуштарин ҳам 4,8-ро ташкил хоҳад дод. «Афзоиш дар чунин сатҳ дар сурати таъсири шадиди буҳрон ба иқтисоди мо имконпазир аст», – шарҳ дод вазири рушди иқтисод.
Зимнан таъкид гардид, ки ҳукумати Тоҷикистон дар ростои муқобилат бо буҳрони глобалии моливу иқтисодӣ аз як таҷрибаи муайяне бархӯрдор аст. «Мо ҳанӯз соли 2009-ро дар хотир дорем, ки он замон таҳти таъсири буҳрон сатҳи афзоиши иқтисоди мо ҳамагӣ 3,9%-ро ташкил дода буд», – афзуд Ш.Раҳимзода.
