Ба ШВКД дар ноҳияи Вахш сокини ҳамин ноҳия Файзигул Шарифоваи 35-сола муроҷиат намудааст, ки рӯзи 25 феврал шахси номаълум пинҳонӣ ба дӯкони тиллофурӯшиаш дар маркази ноҳия ворид шуда, аз он ҷо 97 адад ангуштаринҳои тиллоиро дуздида, аз ҷойи ҳодиса ғайб задааст.
Бино ба иттилои маркази матбуоти ВКД ҶТ, арзиши умумии маснӯоти заргарии дуздидашуда 27 ҳазору 50 сомониро ташкил дода, дар натиҷаи гузаронидани чорабиниҳои оперативӣ-ҷустуҷӯии кормандони милитсия ба гумони даст доштан дар ин ҷиноят сокини маҳаллӣ Рустам Қосимови 39-сола боздошт ва аз ӯ далелҳои шайъӣ гирифта шудаанд.
Зимнан зикр мегардад, ки нисбати ҳодисаи мазкур парвандаи ҷиноятӣ оғоз гардида, тафтишот дар ин самт идома дорад.
