Палатаи поёнии парлумони Тоҷикистон созишнома дар бораи ҳамкории кишварҳои узви Иттиҳоди Давлатҳои Мустақил дар бахши таъмини амнияти иттилоотиро тасдиқ кард.
Зимни шарҳи моҳияти созишномаи мазкур ба вакилон дар ҷаласаи навбатии парлумон муовини раиси Кумитаи давлатии амнияти миллии ҷумҳурӣ Суҳроб Паноев қайд кард, ки созишномаи мазкур аз ҷониби нахуствазирони кишварҳои узви ИДМ 20 ноябри соли 2013 дар шаҳри Санкт-Петербург ба имзо расида буд.
Зимнан зикр гардид, ки ин созишномаро ҳамчунин Арманистон, Беларус, Қазоқистон, Қирғизистон ва Русия низ ба имзо расонида, аз ҷониби Озарбойҷон, Молдова, Ӯзбекистон, Туркманистон ва Украина имзои он рад шудааст.
«Ҳадафи созишномаи мазкур роҳандозии тадбирҳои ҳамоҳангшудаи муштарак дар самти таъмини амнияти иттилоотии кишварҳои иштирокчии созишнома мебошад», – зикр мегардад дар санади мазкур.
