Дар вилояти Суғд ҷаласаи Кумитаи низомии Созмони Аҳдномаи амнияти дастаҷамъӣ (СААД) идома дорад, ки дар доираи он вохӯрии кории сардори мақомоти иктишоф (разведка)-и ҳарбии Қувваҳои Мусаллаҳи кишварҳои узви Созмон баргузор мешавад.
Роҳбари маркази матбуоти Вазорати мудофиаи ҶТ Фаридун Маҳмадлиев ба «Азия-Плюс» дар ин робита иттилоъ дод, ки ҷаласаи мазкур рӯзи 8 апред дар шахри Қайроққум оғоз гардида, дар кори он ҳайатҳои Ситодҳои кулли Қувваҳои Мусаллаҳи Арманистон, Беларус, Қазоқистон, Қирғизистон, Тоҷикистон ва Русия иштирок доранд.
Ба иттилои мнабаъ, дар ҷаласа масъалаҳои таҳдиду чолишҳо ба амнияти низомӣ дар минтақаҳои таҳти масъулияти СААД қарордошта, таҳияи тадбирҳо ва вокуниш ба онҳо, рушди таркибҳои низомӣ, аз ҷумла баргузории чорабиниҳои муштараки омодагии ҷангӣ дар соли равон, дурнамои рушди Нерӯҳои ҳомии сулҳи СААД, роҳандозии чораҳои мудофиаи зидди ҳавоӣ дар доираи Созмон ва ҳамчунин такмили корҳои омодасозии кадрҳои низомӣ барои кишварҳои узви СААД мавриди таҳлилу баррасӣ қарор доранд.
Ҷаласа таҳти раҳбарии раиси Кумитаи низомӣ, сардори Ситоди кулли Қувваҳои Мусаллаҳи Тоҷикистон, муовини аввали вазири мудофиаи ҶТ Шарифзода Зарифи Тоҳирӣ ҷараён дорад.
Дар анҷоми кори ҷаласа баимзорасии санадҳои дахлдор аз рӯи натиҷаҳои он ва баргузории нишасти хабарӣ дар назар аст.
Кумитаи низомӣ дар назди Шӯрои вазирони мудофиаи кишварҳои узви СААД таъсис дода шуда, ба ҳайати он сардорони ситодҳои кулли Қувваҳои Мусаллаҳи кишварҳои узви Созмон ва сардори Ситоди муттаҳидаи СААД шомил мебошанд. Дар ҷаласа муовини дабири кулли СААД Валерий Семериков иштирок ва суханронӣ мекунад.
Қобили зикр аст, ки ҷаласаи Кумитаи низомӣ дар остонаи ҷаласаҳои мақомоти оинномавии СААД (моҳи майи соли 2015) баргузор мегардад.
