Рӯзи 8 апрел вазири корҳои дохилӣ генерал-лейтенанти милитсия Раҳимзода Рамазон Ҳамро дар ҳузури сардорони раёсат ва ҷузъу томҳои мақомоти корҳои дохилӣ собиқ сардори РВКД дар шаҳри Душанбе генерал-майори милитсия Ҷӯрахонзода Саид Қаюмро ба муносибати ба нафақа баромаданаш табрик намуда, аз хизматҳои шоиста дар мақомоти корҳои дохилӣ ва саҳми арзандаи гузоштааш дар тарбияи кадрҳои ҷавон ёдовар шуд.
Бино ба иттилои маркази матбуоти ВКД ҶТ, Рамазон Раҳимзода барои фаъолияти пурмаҳсул ва заҳматҳои шабонарӯзӣ дар самти мубориза бар зидди ҷинояткорӣ ва ҳифзи тартиботи ҷамъиятӣ ба генерал-майори милитсия Ҷӯрахонзода Саид Қаюм изҳори миннатдорӣ намуда, қайд кард, ки боиси ифтихор аст, тӯли солҳои зиёд чунин марди наҷиб бо иродаи қавӣ дар сафи мақомоти корҳои дохилӣ бе нуқсон фаъолият намудааст. Изҳори боварӣ карда шуд, ки мавсуф минбаъд низ ҳамчун собиқадори ботаҷриба бо мақомоти милитсия дар иртиботу ҳамкорӣ, ҷиҳати тарбияву омодасозии кадрҳои ҷавон саҳми бевоситаи худро мерасонад.
Гуфта мешавад, сардори Раёсати ВКД дар нақлиёт генерал-лейтенанти милитсия Шералӣ Сабзов ва сардори Воҳиди махсуси ВКД полковники милитсия Бароталӣ Ҳамидзода низ доир ба фаъолияти пурмаҳсул ва хизматҳои шоёни Саид Ҷӯрахонзода дар самтҳои гуногуни мақомоти корҳои дохилӣ ёдовар шуда, изҳор доштанд, ки ҳисси масъулиятшиносӣ ва лаёқату кордонии мавсуф ибратбахши насли ҷавони милитсия мебошад.
Зимнан зикр мегардад, ки дар маросими тантанавӣ вазири корҳои дохилӣ ба Саид Ҷӯрахонзода «Сипосномаи Вазири корҳои дохилии Ҷумҳурии Тоҷикистон» ва тӯҳфаи хотиравӣ – як адад телевизор тақдим намуд.
