Тариқи ҳавопаймоҳои Кумитаи ҳолатҳои фавқулодаи Русия имрӯз боз 25 нафар шаҳрвандони Тоҷикистон аз Ямани ҷангзада берун бароварда мешаванд. То имрӯз Русияба аз қаламрави ин кишвар бароврадани 130 нафар шаҳрвнадони Тоҷикистон, ки бо оилахои худ дар Яман кору зиндагӣ мекарданд, мусоидат намуд.
Намояндаи расмии Вазорати корҳои хориҷии ҶТ Абдулфайз Атоев ба «Азия-Плюс» дар ин робита изҳор намуд, ки дар рӯйхатҳои аз ҷониби дипломатҳо таҳиягардидаи шаҳрвандони Тоҷикистони муқими Яман ба сурати умум 169 нафар шомил буданд, ки бо кӯдаконашон дар шахри Санъо иқомат мекунанд ва аз ин шумор аллакай 130 нафар тариқи ҳавопаймоҳои КҲФ Русия аз Яман хориҷ шуда, ба ватан баргаштаанд.
«Касоне, ки ба мо муроҷиат мекунанд, мо онҳоро ба рӯйхати шахсони ба кӯчонидан аз Яман эҳтиёҷдошта ворид месозем, аммо табибони тоҷике ҳам ҳастанд, ки хоҳиши тарк кардани ин кишварро надоранд, зеро аз шароити мавҷуда дар он ҷо комилан қаноатманданд», – таъкид дошт Атоев.
Зимнан зикр гардид, ки кормандони намояндагии дипломатии Тоҷикистон дар Арабистони Саудӣ ба корҳои аз Яман берун бурдани шаҳрвандони Тоҷикистон идома медиҳанд.
Ёдрас мекунем, ки нахустин шаҳрвандони Тоҷикистон
рӯзи 3 апрел
тариқи ҳавопаймоҳои Кумитаи ҳолатҳои фавқулодаи Русия аз қаламрави Яман ба Маскав оварда шуданд.
Қаблан иттилоъ дода будем, ки сохторҳои дахлдори Русия ҷиҳати
мусоидат ба хориҷ кардани
шаҳрвандони Тоҷикистон аз Яман омодагӣ изҳор намуданд. Дархости расмӣ ва рӯйхати тоҷикистониёни муқими Яман ба Вазорати корҳои хориҷии Русия фиристода шуда, онҳо ба расонидани кумаки ҳамаҷониба ва мусоидат дар ҳалли масъалаи мазкур омодагӣ изҳор намудаанд.
Мавриди зикр аст, ки шаҳрвандони Тоҷикистон, ки муваққатан дар пойтахти Яман кору зиндагӣ доранд, аз ҳукуматдорони Тоҷикистон
даъват карданд,
ки барои берун шудан аз шаҳри Санъо ва ба ватан баргаштанашон кумак расонанд. Даъватҳои онҳо ҷиҳати кумак дар шабакаҳои иҷтимоӣ нашр шуданд.
Баъди нашри маълумоти дар боло зикршуда аз ВКХ Тоҷикистон ҳамчунин
иттилоъ доданд,
ки аксари табибони тоҷики машғули кор дар Яман ба тарк кардани ин кишвар хоҳиш надоранд, зеро аз шароити мавҷуда дар он ҷо комилан розианд.
Қобили зикр аст, ки шаби 26 март Арабистони Саудӣ ва иттифоқчиёни ӯ алайҳи шиаҳои ҳусӣ дар Яман амалиёти низомиро
оғоз намуданд.
Аллакай субҳи рӯзи 26 март дар бораи ҳалокати аҳолии осоишта бар асари ҳамлаҳои ҳавоӣ маълумот интишор шуд.
Бино ба иттилои
радиои «Озодӣ»
, Амрико ва Лигаи Араб аз ҳамлаҳои таҳти раҳбарии Саудия алайҳи шиаҳои ҳусӣ дар Яман пуштибонӣ карда, аммо Эрон хостори хатми билофосилаи ин амалиёт шудааст.
