Сафири Ҷопон дар Тоҷикистон (қароргоҳ дар Қирғизистон) Такаюкӣ Коике рӯзи 9 апрели соли 2015 барои мушорикат дар маросими анҷом ёфтани «Лоиҳаи сохтмони Маркази бонувон дар ноҳияи Қумсангир» ба ноҳияи Қумсангир ташриф овард.
Тавре аз сафорати Ҷопон дар ҶТ хабар доданд, дар чаҳорчӯбаи Барномаи Ҳукумати Ҷопон оид ба кӯмакҳои бебозгашт ва амнияти башарӣ барои бахши аъзами аҳолӣ ба созмони ҷамъиятии «Моҳи Мунир» аз тарафи Ҳукумати Ҷопон маблағи умумии 113 ҳазору 348 доллари ИМА барои сохтмони маркази мазкур дастрас гашта буд.
Гуфта мешавад, қаблан Маркази бонувон бинои алоҳида надошта дар бинои истиқоматӣ ҷойгир буд, ки барои фаъолиятҳои гуногуни марказ кофӣ набуд. Алъон бо сохтмони бинои нави дуошёна воқеъ дар маркази ноҳия, Маркази бонувон дорои фазои кофӣ барои гузаронидани кулли фаъолиятҳо, аз ҷумла курсҳои компютерӣ ва дӯзандагӣ, хизматрасониҳои машваратҳои оилавӣ ба занони ноҳияи Қумсангир ва гирду атрофи он мебошад. Омӯзишҳо ва хизматрасониҳо дар Маркази мазкур аз тарафи дигар донорҳои маҳалӣ ва байналмиллалӣ низ дастгирӣ меёбанд.
Зимнан зикр мегардад, ки биноан ҳукумати Ҷопон тасмим гирифтааст, ки дар оянда низ дар ҳамкорӣ бо мардуми Тоҷикистон баҳри бунёд сохтани ҷомеаи беҳтар кӯмаки хешро идома медиҳад.
Кӯмакҳои бебозгашт барои бахши аъзами аҳолӣ ва амнияти башарӣ тарҳи Барномаи расмии Ҷопон оид ба рушд мебошад. Алалхусус, лоиҳаҳои кӯмакҳои бебозгашт барои бахши аъзами аҳолӣ ва амнияти башарӣ барои дастгирӣ намудани соҳаҳои мухталифи бахши аъзами аҳолӣ дар сартосари Ҷумҳурии Тоҷикистон равона карда шудаанд. Кӯмакҳои бебозгашти лоиҳаҳои амнияти башарӣ барои бахши аъзами аҳолӣ ба ҳокимиятҳои маҳаллӣ, соҳаҳои маориф ва тандурустӣ, ҳамчунин ба созмонҳои ғайридавлатӣ расонида мешавад. Аз соли 1996 то инҷониб, кӯмакҳои бебозгашт барои бахши аъзами аҳолӣ ва амнияти башарӣ 341 лоиҳаро ба маблағи умумии $27.6 миллион доллари ИМА дар Тоҷикистон амалӣ намудааст.
