Рӯзи 9 апрел суди шаҳри Хуҷанд нисбати панҷ нафар сокини вилояти Суғд – аъзои фаъоли созмони ифротгарои «Ҳизб-ут-Таҳрир», ки қаблан барои содир намудани ба ин монанд ҷиноят маҳкум шуда буданд, ҳукм содир намуд.
Тавре ба «Азия-Плюс» як манбаъ аз суди шахри Хуҷанд дар ин робита иттилоъ дод, се нафар аз маҳкумшудагон сокинони шаҳри Хуҷанд, як нафар сокини шаҳри Чкаловск ва як нафари дигар зодаи шаҳри Исфара буда, синнашон аз 35 то 42-соларо ташкил медиҳад.
Суд онҳоро дар содир намудани ҷиноят мутобиқи моддаҳо 307-и Кодекси ҷиноии ҶТ (Ташкили иттиҳоди экстремистӣ (ифротгароӣ) гунаҳкор эътироф намуда, ба муҳлати аз 3 то 3,5 сол равонаи зиндон кард. Муҳлати ҷазоро маҳкумшудагон дар зиндони низомаш умумӣ адо мекунанд.
Ба иттилои манбаъ, маҳкумшудагон ба фаъолияти созмони ифротгарои «Ҳизб-ут-Таҳрир» дар қаламрави вилояти Суғд тақвият бахшиданӣ будаанд, зеро ба андешаи «Амир»-и ин ташкилот, солҳои ахир фаъолияти ин созмон дар минтақаи шимоли Тоҷикистон ғайриқаноатбахш гардида, бо ин мақсад ӯ ҷалби аъзои фаъоли қаблан маҳкумшуда ба ин корҳоро доштааст.
«Аз моҳи октябри соли 2013 то замони боздошт, 6 ноябри соли 2014 маҳкумшудагон ҳамроҳ 6 маротиба дар чойхонаву ошхонаҳои гуногуни шаҳр вохӯрии аъзои созмонро баргузор намуда, роҳу воситаҳои тақвият бахшидан ба фаъолияти созмон дар қаламрави вилоятро баррасӣ кардаанд», – гуфт манбаъ.
Созмони ифротгарои «Ҳизб-ут-Таҳрир» соли 1952 дар Фаластин таъсис дода шудааст. Ҳадафи он сарнагун кардани сохти конститутсионӣ дар кишварҳои мусалмонӣ ва бунёди халифат аст. Дар аксари кишварҳо ин созмон ифротгаро эътироф гардидааст. Соли 2001 бо қарори Суди олии ҶТ фаъолияти созмони ифротгарои динии «Ҳизб-ут-Таҳрир» дар қаламрави Тоҷикистон мамнӯъ эълон гардид. Соли 2008 созмон ба рӯйхати ташкилотҳои ифротгаро шомил гардида, фаъолони он тибқи қонун мавриди пайгард қарор доранд.
