Дар доираи сафари кории вазири корҳои дохилии Тоҷикистон Рамазон Раҳимзода ба минтақаи Рашт бо иштироки ӯ Маркази иттилоотӣ-таҳлилии РВКД дар ин минтақа ва ноҳияи Рашт ифтитоҳ гардид.
Бино ба иттилои маркази матбуоти ВКД ҶТ, зимни боздид аз Маркази навтаъсис Рамазон Раҳимзода аз шароитҳои муҳаёгардида, аз қабили утоқҳои корӣ, таҷҳизоти техникӣ, мизу курсӣ, воситаҳои алоқа, ҷевонҳо барои ҷобаҷогузории ҳуҷҷатҳо ва дигар лавозимотҳои зарурӣ изҳори қаноатмандӣ кард.
Сипас дар саҳни бинои Маркази мазкур вазири корҳои дохилӣ бо ҳайати шахсии РВКД дар минтақа ва ноҳияи Рашт сӯҳбат намуда, онҳоро барои софдилона ва содиқона иҷро намудани дастуру супоришҳо ва хуб ба роҳ мондани фаъолияти хизматӣ ҳидоят кард.
Баъд бо иштироки Рамазон Раҳимзода дар Шӯъбаи Бозрасии давлатии автомобилии РВКД минтақа ва ноҳияи Рашт барои ҳайати шахсӣ ҳаммоми ҳозиразамони муҷаҳҳаз бо таҷҳизоти замонавӣ ва майдончаи варзишӣ мутобиқ ба талаботҳои муосир мавриди истифода қарор дода шуд.
Вазири корҳои дохилӣ Рамазон Раҳимзода зимни сӯҳбат бо ҳайати шахсии Дастаи таъиноти махсуси милитсия (ОМОН)-и РВКД дар минтақа ва ноҳияи Рашт изҳор дошт, ки баҳри мубориза бар зидди терроризм, экстремизм ва дигар ҷиноятҳои муташшакилу фаромиллӣ кормандони милитсия бо дарки баланди масъулиятшиносӣ бояд аз иҷрои вазифаҳои бар дӯш дошта, бо сарбаландӣ бароянд.
Сафари хизматии вазири корҳои дохилӣ Рамазон Раҳимзода дар ноҳияи Рашт ва минтақа имрӯз идома меёбад.
