Муовини нахуствазири Тоҷикистон Азим Иброҳим зимни сафари дурӯзаи корӣ ба минтақаи Кӯлоби вилояти Хатлон бо фаъолияти як қатор корхонаҳои саноатии ин минтақа аз наздик ошно гардид.
Сармушовири хадамоти матбуоти президенти ҶТ Субҳиддин Муҳиддинов ба «Азия-Плюс» дар ин робита иттилоъ дод, ки аз ҷумла Азим Иброҳим бо фаъолияти корхонаи дӯзандагии «Султони Кабир» дар ноҳияи Восеъ, комбинати шири шаҳри Кӯлоб, корхонаи коркарди сабзавоту мева ва корхонаи паррандапарварии ноҳияи Муъминобод, корхонаи нассоҷии «Адолат» ва комбинати консерви ноҳияи Фархор ва ҳамчунин корхонаи масолеҳи сохтмони ноҳияи Ҳамадонӣ шинос шуд.
Ба иттилои манбаъ, аз рӯйи натиҷаҳои сафар Азим Иброҳим дар шаҳри Кӯлоб бо иштироки раисони шаҳру навоҳии минтақа, соҳибкорони маҳаллӣ, иқтисодчиён ва намояндагони корхонаҳои зертобеъи вазорату идораҳои дахлдори кишвар дар ин минтақа машварати корӣ баргузор намуд.
Зимнан зикр гардид, ки дар машварат аз фаъолияти комплекси саноатӣ ва аграрии гурӯҳи ноҳияҳои минтақаи Кӯлоб дар семоҳаи аввали соли ҷорӣ қисман натиҷагирӣ шуда, барои фаъолияти пурсамари минбаъда дастуру вазифаҳои мушаххас дода шуданд.
