Дар чаҳорчӯби амалисозии лоиҳаи «Кӯмаки техникӣ оид ба мустаҳкамгардонии системаи иттилоотии соҳаи тандурустӣ дар Тоҷикистон», ки аз ҷониби Иттиҳоди Аврупо (ИА) маблағгузорӣ карда мешавад, омӯзиши тренерон дар мавзӯи «Сифати маълумот, истифодабарӣ ва қарорбарорӣ дар асоси маълумоти исботшуда» барои 20 мутахассисони сатҳи ҷумҳуриявӣ ва вилоятӣ оғоз гардид.
Тавре аз намояндагии ИА дар Тоҷикистон хабар доданд, мустаҳкамкунии системаи идоракунии соҳаи тандурустӣ ва истифодаи он аз тарафи Вазорати тандурустӣ ва ҳифзи иҷтимоии Ҷумҳурии Тоҷикистон (ВТҲИАҶТ), Вазорати адлияи Ҷумҳурии Тоҷикистон ва Раёсати сабти асноди шаҳрвандӣ ҳадафи асосии лоиҳа мебошад.
Системаи DHIS2 барои ворид, таҳлил ва тартиб додани ҳисоботҳо пурра мувофиқа карда шудааст. Он аз санҷиш гузашта аз 1 январи соли 2015 дар сатҳи ҷумҳурӣ дар реҷаи онлайн ба роҳ монда шудааст. Ҳисоботҳои омории тандурустии соли 2014 бо истифодаи системаи иттиллоотии DHIS2 пурра баррасӣ карда шудаанд.
“Ҳадафи асосии системаи иттиллоотии ИСУЗ ин баррасӣ кардани маълумоти дақиқу саҳеҳ ва дар асоси ин маълумоти исботшуда баровардани қарорҳои зарурии дахолатҳои системаи тандурустӣ мебошад. Мо истифодабарии маълумотро яке аз масъалаҳои асосии кори бомуваффақияти системаи ИСУЗ меҳисобем.
Тренинги омӯзишии 5-рӯза барои тренерон дар мавзӯи «Сифати маълумот, истифодабарӣ ва баровардани қарорҳои асосноки исботшуда» бо кӯмаки шарикони лоиҳа ташкилоти HISP Ҳиндустон ташкил карда шуд. Дар тренинг мутахассисони ВТҲИАҶТ, Агентии омори назди Президенти ҶТ, Донишгоҳи давлатии тиббии Тоҷикистон ба номи Абуалӣ ибни Сино ва Донишкадаи такмили ихтисоси кормандони тиббии ҶТ иштирок намуданд.
Иштироки намояндагони донишкадаву донишгоҳҳо барои интегратсияи барномаи тренинг бо барномаҳои таҳсилӣ муосидат менамояд. То охири соли 2015 мо ба нақша гирифтем, ки зиёда аз 200 роҳбарон ва шахсони масъули қарорбарор дар мавзӯи сифати маълумот, истифодабарӣ ва қарорбарорӣ дар асоси маълумоти исботшуда, омӯзонем» -гуфт роҳбари лоиҳа хонум Елена Максименко.
Лоиҳаи Иттиҳоди Аврупо «Кӯмаки техникӣ оид ба мустаҳкамгардонии тартиби иттилоотии соҳаи тандурустӣ дар Ҷумҳурии Тоҷикистон», бо буҷаи 3,4 миллион евро, системаи электронии ҳисоботиро дар сатҳи миллӣ татбиқ гардонида истодааст.
Лоиҳа дар якҷоягӣ бо консорсиуми ширкатҳои EPOS Health Management (Олмон), ICON-Institute Public Sector (Олмон) бо иштироки Донишгоҳи шаҳри Осло (Норвегия) ва ширкати IrfatC (Тоҷикистон) амалӣ мегардад. Лоиҳа то моҳи маи соли 2016 татбиқ мегардад.
