Рӯзи шанбеи ҳафтаи гузашта дар шаҳри Душанбе маросими савгандёдкунии 150 нафар наваскарони Гвардияи миллии Тоҷикистон баргузор шуд, ки дар ин маросим фармондеҳони даъватшудагон, падару модарон ва собиқадорони ҷангу меҳнат ҳузур доштанд.
Тавре ба «Азия-Плюс» як манбаъ аз Гвардияи миллии Тоҷикистон хабар дод, ба санаи 25 апрел нақшаи даъвати баҳорӣ ба хизмати ҳарбӣ дар сафҳои ин ниҳод 95% иҷро шудааст.
Ба гуфтаи манбаъ, аксари наваскарони даъватшуда ба хизмат дар сафҳои Гвардияи миллӣ ҷавононе мебошанд, ки ихтиёрӣ ба хизмат омадаанд. «Ҳамчунин шумори даъватшавандагони ихтиёрии дорои маълумоти олӣ низ зиёд мешавад», – таъкид дошт манбаъ.
