Дар Қасри тенниси шаҳри Душанбе рӯзҳои 25-26 апрел бахшида ба ҷашни 70-солагии Ғалаба дар Ҷанги Бузурги Ватании солҳои 1941-1945 мусобиқаи кушода байни дӯстдорони теннис барои Ҷоми пойтахти Тоҷикистон доир гардид.
Бино ба иттилои маркази матбуоти Кумитаи миллии олимпии ҷумҳурӣ, Ҷамолиддин Убайдуллоев, сардори Раёсати созмонҳои байналмилалии Вазорати корҳои хориҷии Тоҷикистон, ки фарзанди бузурги Маҳмадсаид Убайдуллоев, раиси Маҷлиси миллии Маҷлиси Олии Тоҷикистон ва раиси шаҳри Душанбе мебошад, дар қувваозмоии ниҳоӣ бар ғолиби порсолаи ин мусобиқа Қосим Раҷабмадов, корманди масъули Кумитаи ҳолатҳои фавқулоддаи Тоҷикистон, пирӯз шуд ва бо мукофоти аслӣ – Ҷоми Пойтахт, медали тилло ва тӯҳфаҳо сарфароз гашт. Ба Раҷабмадов барои ҷойи дуюм ҷому медали нуқра ва тӯҳфаҳо супурда шуд.
Гуфта мешавад, Амирҷон Убайдуллоев, бародари хурдии Ҷамолиддин, ки муовини мудири шӯъбаи молияи Дастгоҳи иҷроияи президенти Тоҷикистон аст, ҷойи сеюм ва Баҳодур Ҳомидов, прокурори ноҳияи Синои Душанбе, ҷойи чорумро гирифтанд. Ҳарду бо ҷому медалҳои биринҷӣ ва тӯҳфаҳо мукофотонида шуданд.
Ба ҳамаи ширкаткунандагони мусобиқа ва ҳайати доварон сертификатҳои Кумитаи байналмилалии олимпӣ ва Кумитаи миллии олимпии Тоҷикистон, инчунин тӯҳфаҳои Ширкати мобилии “Мегафон” супурда шуд.
