Рӯзи 25 апрел дар маҷлиси як доираи хурди шахсони шубҳанок, ки худро коммунист меноманд, мансаби котиби якуми Кумитаи вилоятии Ҳизби коммунисти Тоҷикистон дар вилояти Суғд бори навбатӣ аз ҷониби Қурбонҷон Мирзоева ғасб шуд, ки тайи чандин соли ахир муқобили сиёсати Кумитаи марказии ҲКТ садо баланд мекунад. Дар ин бора ба «Азия-Плюс» раиси Ҳизби коммунисти Тоҷикстон Шодӣ Шабдолов хабар дод.
Ба гуфтаи ӯ, роҳбари кумитаи вилоятии ҲКТ дар Суғд Абдуалӣ Маҳкамов муддати тӯлонӣ бемор буда, ахири моҳи августи соли гузашта ба раҳбарияти ҲКТ дар бораи озод карданаш аз ин мансаб бо сабаби бемориаш муроҷиат кардааст.
«Он замон КМ ҲКТ тасмим гирифта буд, ки оид ба баррасии ин масъала нимаи дуюми моҳи сентябр пленуми кумитаи вилоятии Суғдро даъват намояд, вале 11 сентябри соли гузашта як гурӯҳи шахсон дар шаҳри Хуҷанд пленум баргузор намуда, ба мансаби котиби аввали кумитаи вилоятии ҳизб Абдуҷаббор Аҳмедовро интихоб карданд, ки ба Ҳизби коммунист ҳеҷ муносибате надорад», – иброз дошт Шабдолов.
Раиси ҲКТ қайд кард, ки мувофиқи оинномаи ҲКТ, роҳбарони ташкилотҳои вилоятӣ, ноҳиявӣ ва шаҳрии Ҳизби коммунист бидуни мувофиқа бо Кумитаи Марказӣ интихоб шуда наметавонанд ва дар ин ҳолат ин муқаррарот ба инобат гирифта нашуд.
«Рӯзи 27 сентябри соли гузашта президиуми КМ ҲКТ қарори дар боло зикршудаи пленуми коммунистони Суғдро бекор карда, раҳбарии ташкилоти ҳизбӣ дар вилоятро ба дӯши котиби якуми кумитаи ҲКТ дар шаҳри Хуҷанд Мубинҷон Маҳмудов вогузор намуд, вале он замон Аҳмедов ошкоро изҳор намуд, ки қарори мазкурро иҷро карданӣ нест», – таъкид дошт номбурда.
Ба қавли Шабдолов, Аҳмедов ва Мирзоева, ҳамчунин атрофиёни наздикашон бо дастури доираҳои ҳукуматӣ мехоҳанд миёни комунистони Тоҷикистон ҷудоӣ андозанд, вале чунин кӯшишҳо алайҳи ҲКТ ҳамеша бо нокомӣ анҷом пазируфта буданд ва имрӯз ҳам комиссияи махсус таъсисёфтаи КМ ҲКТ ин масъаларо мавриди омӯзиш қарор додааст, ки дар ояндаи наздик аз рӯи хулосаҳои он пленуми муштараки КМ ҲКТ ва кумитаи вилоятии коммунистони Суғд даъват карда мешавад.
«Ман ҳамчун пешвои ҳизб ояндаи наздик дар ҷаласаи президиуми КМ ҲКТ оид ба аз сафҳои ҳизб хориҷ кардани 20-30 нафар ҷудоихоҳон аз ҳисоби ба истилоҳ коммунистони Суғд масъала ба миён мегузорам», – афзуд Шабдолов.
