Ахири ҳафтаи сипаришуда муовини аввали вазири молияи Тоҷикистон Ҷамолиддин Нуралиев бо ҳайати Фонди зиддибуҳрони Бонки авруосиёии рушд (БАОР) дидору гуфтушунид кард.
Бино ба иттилои котиботи Вазорати молияи ҶТ, зимни мулоқот оид ба масоили муҳими рӯзмарра ва дурнамои ҳамкориҳо дар бахши молия ва дигар соҳаҳо табодули назар сурат гирифта, ҳамчунин самтҳои афзалиятноки сиёсати ҳукумати кишвар ва масъалаҳои сиёсати умумӣ баррасӣ шуданд.
Ҷонибҳо ба масъалаҳои рушди бахши энергетика дар Тоҷикистон, шартҳои баррасӣ ва маблағгузории лоиҳаҳо аз ҳисоби воситаҳои Фонди зиддибуҳронии БАОР таваҷҷуҳи хосса зоҳир карданд.
Нуралиев таъсири манфии буҳрон ба иқтисоди Тоҷикистон ва дар маҷмӯъ минтақаро таъкид дошта, қайд кард, ки назар ба воситаҳои қарзӣ, афзоиши пешниҳоди воситаҳои бурсӣ ба бахшҳои афзалиятноки кишвар мувофиқи мақсад аст.
Ҳамчунин дар ҷараёни вохӯрӣ муҳим будани амалисозии барномаҳои кунуниву оянда ва зарурати ҳамоҳангсозии онҳо бо вазорату идорахои дахлдори ҷумҳурӣ, мувофиқасозии муносибатҳо бо Фонди зиддибуҳронии БАОР, Бонки осиёгии рушд ва дигар ниҳодҳои байнулмилалии молиявӣ ва бонкӣ таъкид шуд.
Муовини аввали вазири молия изҳори итминон кард, ки ҳамкорӣ бо БАОР минбаъд низ дар заминаи созанда рушду тавсеъа хоҳад ёфт.
