Солгарди навбатии Истиқлолияти Тоҷикистон, ки пагоҳ, 9 сентябр таҷлил мегардад, имсол бекарруфар ҷашн гирифта мешавад.
Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, имсол ба ин муносибат баргузории ҷамъомади тантанавӣ бо иштироки президенти мамлакат Эмомалӣ Раҳмон ба нақша гирифта нашудааст.
Ҳамчунин намоишномаи театрикунонидашуда ва консерти устодони санъат дар сатҳи ҷумҳуриявӣ, ки қаблан дар маҷмааи «Наврӯзгоҳ»-и пойтахт бо ҳузури аъзои ҳукумат, вакилони парлумон, аҳли ҷомеа ва намояндагони корпуси дипломатии муқими Душанбе доир мегардид, баргузор намешавад. Имсол ба ин муносибат гузашти низомӣ ва фейерверкафканӣ низ доир намегардад.
Бино ба маълумоти як манбаъи «Азия-Плюс» дар дастгоҳи раиси шаҳри Душанбе, соати 18-00-и пагоҳ, 9 сентябр дар майдони назди шаршараи маҷмааи «Наврӯзгоҳ»-и пойтахт бо иштироки ситораҳои эстрадаи тоҷик консерти идона доир мегардад.
Ғайр аз ин, шурӯъ аз соати 10-00-и рӯз дар боғҳои фарҳангу истироҳати «Кӯли ҷавонон», «Дӯстии халқҳо» ва майдони 800-солагии Маскави пойтахт консерту дигар чорабиниҳои идона, намоишгоҳу ярмаркаҳои маснӯоти қаннодӣ, таомҳои миллӣ ва маҳсулоти саноатӣ барпо карда мешавад.
