Дар Рӯзи байнулмилалии ҳамраъйии журналистон дар толори маҷмааи табъу нашри «Шарқи озод» маҳфили ёдбуди собиқ раиси Иттиҳоди журналистони Тоҷикистон Акбаралӣ Сатторов доир гардид, ки дар он рӯзноманигорони васоити ахбори умуми ватаниву хориҷӣ, аҳли илму адаб ва ҳамчунин хешону наздикон ва дӯстони марҳум гирдиҳам омаданд.
Иштирокдорони чорабинӣ қайд карданд, ки Акбаралӣ Сатторов воқеъан ҳам муассиси васоити ахбори умуми мустақили кишвар буда, бо ин иқдом номи худро дар таърихи журналистикаи тоҷик сабт кардааст.
Ҳамчунин зикр гардид, ки Акбаралӣ Сатторов ҳеҷ гоҳ аз ҷомеа дур набуд, ҳамеша дар паҳлӯи журналистон қарор дошт ва ҳанӯз то замони интихобаш ба садри Иттиҳоди Журналистони Тоҷикистон, ҳамаи рӯзноманигрони ҷумҳурӣ раисаш медонистанд.
Дар маҳфил пешниҳод шуд, ки барои ба номи Акбаралӣ Сатторов гузошта шудани номи яке аз кӯчаҳои пойтахт ба маҷлиси вакилони халқи шаҳри Душанбе муроҷиат карда шавад. Ҳамчунин дар бораи омода кардан ва дар шаҳр гузоштани нимпайкараи марҳум пешниҳодҳо садо доданд.
Ғайр аз ин, пешниҳод шуд, ки бо маблағгузории васоити ахбори умуми ватанӣ ҷоизаи ҳамасолаи ба номи Акбаралӣ Сатторов таъсис дода шавад.
Дар назар аст, ки ба маҷлиси маҳаллии вакилони халқи ноҳияи Ҳисор низ муроҷиат карда шавад, то ки ба мактаби таҳсилоти миёнаи умумии №25-и ин ноҳия номи Акбаралӣ Сатторов гузошта шавад.
Боз пешниҳод шуд, ки дар рӯзи марги Акбаралӣ Сатторов (28 август) ҳамасола Рӯзи ҳамраъйии журналистони Тоҷикистон ҷашн гирифта шавад.
