Сокинони Тоҷикистон имсол Иди Қурбонро санаи 24 сентябр таҷлил мекунанд. Шӯрои уламоми Маркази исломии Тоҷикистон таҷлили ин идро ба ҳамин сана таъин кардааст.
Бино ба маълумоти сомонаи расмии Маркази исломии Тоҷикистон, рӯзи 14 сентябр дар ин марказ ҷаласаи навбатии Шӯрои уламо баргузор гардида, раиси Шӯрои уламои Маркази исломии ҷумҳурӣ Саидмукаррам Абдуқодирзода қайд кардааст, ки мувофиқи далелҳои илмӣ ва дар асоси хулосаи олимони Институти астрофизикаи Академияи илмҳои Ҷумҳурии Тоҷикистон, соли ҷорӣ Иди Қурбон дар кишвар ба рӯзи 24-уми сентябр рост меояд. Вақти баргузоршавии намози иди Қурбон дар қаламрави кишвар соати 7.00 муайян карда шудааст.
Маъмулан, дар ин рӯз субҳи зуд кӯдакон бо табрикоти ид ба хонаҳо омада, идона мегиранд. Рӯзи ид пас аз адои намози ид мардум ба дидори хешу ақрабо ва барои дуову фотеҳа сари мазори гузаштагони худ мераванд. Баҳри пешвози меҳмонон дар хонаводаҳо дастурхони идона ороста мешавад.
Иди Қурбон идест, ки онро ҳамасола мусалмонони ҷаҳон дар рӯзи 10-уми Зулҳиҷҷа пас аз 2 моҳу 10 рӯзи Иди Фитр ҷашн мегиранд. Ашхоси тавонманд дар ин рӯз, тибқи расми ин ойини мазҳабӣ, гӯсфанд қурбонӣ карда, ба ҳамсояҳои камбизоат ва мардуми дастнигар либосворӣ ва ё пулу маводи ғизоӣ кумак мекунанд.
Дар Иди Қурбон мусалмонони ҷаҳон ба сафари ҳаҷ рафта, зиёрати Хонаи худоро ба ҷо меоранд.
Мутобиқи Қонуни ҶТ «Дар бораи рӯзҳои ид», Иди Қурбон дар кишвар рӯзи истироҳат эълон шудааст.
