Санаи 24 сентябри соли 2015 дар қароргоҳи СММ дар Ню-Йорк вазири корҳои хориҷии Тоҷикистон Сироҷидин Аслов дар Иҷлоси 39-уми вазирони корҳои хориҷии Гуруҳи 77 ва Чин иштирок кард.
Бино ба иттилои Вазорати корҳои хориҷии ҶТ, иҷлос таҳти раёсати вазири корҳои хориҷии Ҷумҳурии Африқои Ҷанубӣ Маите Нкоана-Машабане баргузор гардид.
Гуфта мешавад, вазири корҳои хориҷии Тоҷикистон дар суханронии худ таваҷҷуҳи ҳозиринро ба мушкилот ва чолишҳои кишварҳои тараққикунанда, ба вежа кишварҳои тараққикунандаи маҳсур дар хушкӣ дар раванди таъмини рушди устувор, аз ҷумла ба мушкилоти коҳиши камбизоатӣ, баландбардории сатҳи зиндагии мардум, коҳиши нобаробарӣ ва таъмини ниёзҳои асосии инсон, инчунин тағйирёбии иқлим ва таъсири ҷиддии он ба наслҳои оянда ҷалб кард.
Ба иттилои манбаъ, Сироҷиддин Аслов инчунин аз кишварҳои узви Гурӯҳ ҷиҳати дастгирӣ аз иқдоми нави Тоҷикистон роҷеъ ба роҳандозии Даҳсолаи нави байналмилалии амал “Об барои рушди устувор” даъват ба амал овард.
Зимнан зикр мегардад, ки дар хотима вазирони корҳои хориҷӣ Декларатсияи вазирони Гурӯҳи 77-ро қабул карданд.
