Бонки осиёгии рушд (БОР) тарҳи индикативӣ (тавсиявии)-и кумак ба Тоҷикистон давоми солҳои 2016-2018-ро навсозӣ кард.
Намояндаи доимии БОР дар ҶТ С.Си.Ю рӯзи сешанбе зимни брифинг дар Душанбе дар ин робита изҳор намуд, ки барномаи навшудаи бонк дар Тоҷикистон тӯли се соли наздик ба дастгирии рушди фарогири иқтисодӣ тавассути пуштибонӣ аз ислоҳоти сохторӣ барои беҳбуди муҳити сармоягузорӣ, рушди роҳу энергетика, баланд бардоштани малакаҳои касбӣ ва беҳтар кардани шароити расидан ба таъмини амнияти ғизойӣ равона карда мешавад.
Дар Нақшаи кишварии сесола (солҳои 2016-2018)-и амалии тиҷорат (СОБП) дар ҳаҷми умумии сармоягузорӣ ба маблағи беш аз 240 млн. доллари ИМА амалисозии лоиҳаҳои таъмиру азнавсозии роҳи Душанбе-Қӯрғонтеппа, беҳбуди амнияти ғизойӣ, дастгирии идоракунии захираҳои об, беҳтар кардани вазъи бахши энергетика ва ислоҳоти муҳити сармоягузорӣ дар назар аст.
Зимнан зикр гардид, ки ҳаҷми кумаки БОР ба Тоҷикистон дар соли 2016 – 70 млн. ва сармоягузориҳои тарҳрезишуда дар соли 2017 – 85 млн. ва дар соли 2018 – 86 млн. доллари ИМА пешбинӣ шудааст, вале ҳаҷми маблағҳои ниҳоии дастгириву кумак ба дастовардҳо дар ҷумҳурӣ ва мавҷуд будани воситаҳо дар БОР вобаста хоҳанд буд.
Қобили зикр аст, ки Тоҷикистон соли 1998 ба узвияти БОР пазируфта шуда, ин ниҳоди байнулмилалии молӣ яке аз ташкилотҳои асосии мададрасон ба ҷумҳурӣ маҳсуб меёбад. То имрӯз ҳаҷми маблағҳои ҷудошудаи ин ниҳод ба Тоҷикистон ба сифати қарзҳои имтиёзнок, грант ва кумакҳои техникӣ ҳудуди 1,4 млрд. доллари ИМА-ро ташкил медиҳад.
