Сатҳи маргу мир бар асари нимсерӣ ё нимгушнагӣ дар Тоҷикистон 34,9% аз мизони маргу мири умумӣ миёни кӯдаконро ташкил медиҳад. Дар ин бора бо такя ба маълумоти Созмони ҷаҳонии тандурустӣ намояндаи доимии Бонки осиёгии рушд (БОР) дар ҶТ Си.Си.Ю ба журналистон хабар дод.
«Намедонам то куҷо ин маълумот саҳеҳ аст, аммо барои нигаронӣ аз вазъи таъмини амнияти ғизойӣ, таваҷҷуҳ зоҳир намудан ба он кофист», – иброз дошт Си.Си.Ю.
Ӯ қайд кард, ки муддати се соли наздик БОР ният дорад, ки ду лоиҳаи марбут ба беҳбуди вазъи таъъмини амнияти ғизойӣ дар ҷумҳуриро маблағгузорӣ намояд.
Номбурда таъкид дошт, ки амалисозии лоиҳа оид ба идоракуни захираҳои обӣ низ дар назар аст, ки яке аз таркибҳои он ба беҳтар намудани вазъи низомҳои обёрӣ нигаронида шудааст. «Беҳбуди ин низомро мо ба сифати яке аз таркибҳои беҳбуди таъмини амнияти ғизойӣ дар Тоҷикистон баррасӣ мекунем», – гуфт намояндаи БОР.
Ба гуфтаи ӯ, дар соли 2017 амалисозии лоиҳа оид ба беҳбуди таъмини амнияти ғизойӣ ба нақша гирифта шудааст. «Айни замон мо таҳқиқот мегузаронем, то ки самтҳои корамон дар ин масъала муайян карда шавад. Бо эҳтимоли қавӣ метавон гуфт, ки қисматҳои ин лоиҳа истеҳсол ва тақсимоти маҳсулоти ғизойӣ хоҳад буд», – афзуд намояндаи бонк.
