Дар доираи чорабиниҳо ба муносибати 20-умин солгарди таъсисёбии гурӯҳи расонаҳои «Азия-Плюс», раҳбарият ва ҳайати кормандони он баргузор намудани аксияи «20 амали нек»-ро ба нақша гирифтанд.
Қобили зикр аст, ки аксия аз мавзеи дурдасти деҳот, макони иқомати аҳолии кӯчонидашуда, ки шароити зиндагониашон нисбатан душвор аст, оғоз мегардад.
Имрӯз намояндагони «Азия-Плюс» барои кӯдакони деҳаи Фирӯзаи ноҳияи Носири Хусрави вилояти Хатлон чорабинии идона барпо намуда, барои фарзандони аҳолии ба ин мавзеъ кӯчониашуда, ки аз шароити мусоид барои таҳсилу истироҳат маҳруманд, туҳфаҳо ҳадя мекунанд.
Дар ҳайат ҳамчунин Бобои Барфӣ ва Барфак низ ҳузур доранд, ки ба кӯдакон натанҳо шириниву туҳфаҳо ҳадя мекунанд, балки меҳмони чорабинии идонаи кӯдакон шуда, табъи онҳоро болида мегардонанд. Барои кӯдакон консерт ва озмуну дигар бозиҳои шавқовар ташкил карда мешаванд.
Қаблан дар бораи
чӣ гуна ҷашн гирифтани солгарди таъсисёбии гурӯҳи расонаҳоямон
маълумот дода будем. Мувофиқи ин нақшаҳо, давоми тамоми соли 2016 бо хонандагону ҳаводорони нашрияву маҷалла, корбарони сомонаву шунавандагони радио аксияҳои гуногун, озмунҳо, конесрту вохӯриҳо баргузор карда мешаванд.
Мо тасмим гирифтем, ки аз баргузор намудани ҷашнҳои маъмулии пуршукӯҳ даст кашида, ба ивази он ба роҳандозии иқдомҳои хайрия машғул шавем, ки бештар шавқовару муфид аст.
Чорабинӣ дар ноҳияи Носири Хусрав нахустин аз рӯйхати ҷашнии «20 амали нек»-и гурӯҳи расонаҳои «Азия-Плюс» мебошад.
