Ширкати алюминии тоҷик (ТАЛКО) умедвор аст, ки барои маблағгузории муштарак ба лоиҳаи коркарди гурӯҳи конҳои Канчоч шарик дарёфт мекунад.
«Айни замон ширкат роҳу воситаҳои пайдо намудани шарикони бештар муносиб барои сармоягузорӣ ба ин лоиҳаи бузургмиқёсро ҷустуҷӯ дорад», – гуфтанд ба «Азия-Плюс» дар хадамоти матбуоти КВД «ТАЛКО».
Ёдрас мекунем, ки охири моҳи декабри соли гузашта ҳукумати Тоҷикистон пешниҳоди КВД «Ширкати алюминии тоҷик» (ТАЛКО)
дар мавриди коркарди як гурӯҳи конҳои тилло
дар қаламрави ноҳияи Айнии вилояти Суғдро маъқул шуморид. Захираҳои тилло дар ин конҳо 32 тонна ва нуқра ҳудуди 14 тонна арзёбӣ мешаванд.
Ғайр аз ин, дар ин конҳо захираҳои симоб, сурма ва як қатор дигар канданиҳои фоиданок мавҷуданд. Дар гурӯҳи конҳои Канчоч ТАЛКО ҳамасола то 900 ҳазор тонна маъданро коркард карданист.
Гурӯҳи конҳои Канчоч аз 3 иншоот – Чӯлбой (тилло, нуқра), Канчоч (тилло, нуқра, симоб, флюорит) ва Шаҳкон (тилло, сурма, флюорит) иборат аст.
