Сафорати Туркия дар Тоҷикистон маълумоти ВАО дар бораи аз 1 июни соли 2016 аз ҷониби ин кишвар ҷорӣ шудани низоми раводид барои 89 кишвар, аз ҷумла Тоҷикистонро беасос унвон кард.
Дар изҳороти ба дасти «Азия-Плюс» расида қайд мешавад, ки гуфтушунидҳо бо Иттиҳоди Аврупо бо мақсади таъмини озод шудан аз гирифтани раводиди Шенген барои шаҳрвандони Туркия идома доранд.
«Комилан ба тартиб овардани сиёсати раводидии мо бо кишварҳои сеюми Иттиҳоди Аврупо уҳдадориест, ки мо бояд баъди пурра ба узвияти Иттиҳоди Аврупо пазируфта шудани Туркия иҷро намоем», – зикр мегардад дар маълумот.
«Ҳамин тариқ, дар ин марҳила маълумот дар бораи нақшаҳои Туркия оид ба ҷорӣ кардани равуо тариқи низоми раводид аз 1 июни соли 2016 нисбати кишварҳое, ки ба онҳо гирифтани раводиди Иттиҳоди Аврупо зарур аст, асоси воқеъӣ надорад», – таъкид мешавад дар изҳороти сафорат.
Ёдрас мекунем, ки чанде қабл як қатор ВАО бо истинод ба расонаҳои туркӣ, ки дар навбати худ ба маълумоти Вазорати корҳои хориҷии ин кишвар такя мекарданд, хабар доданд, ки тобистони соли равон Туркия бо 89 кишвари ҷаҳон, аз ҷумла бо Тоҷикистон, ки миёни кишварҳо низоми бидуни раводид амал мекард,
реҷаи равуо тариқи раводид (виза)-ро ҷорӣ мекунад
ва аз ҷониби Туркия ҷорӣ кардани низоми раводид яке аз талаботи Иттиҳоди Аврупо аст.
