Бо дастури ҳукумати ҷумҳурӣ ШСХК «Барқи тоҷик» рӯзи 20 январ аз соати 10-00 то нимаи рӯз тамоми маҳаллаҳои аҳолинишини кишварро мунтазам бо нерӯи барқ таъмин мекунад, то ки аҳолии кишвар ба мустақиман тамошову гӯш додани паёми президент ба парлумон имкон дошта бошанд.
Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, паёми ҳамасолаи сарвари давлат ба парлумон яке аз рӯйдодҳои муҳимтарин дар ҳаёти сиёсиву иқтисодӣ ва иҷтимоиву фарҳангии кишвар ба шумор рафта, аз ин рӯи аҳолӣ метавонад онро мустақиман тамошо кунад.
Бино ба гуфти манбаъ, шоми рӯзи 20 январ тамоми шабакаҳои телевизиони кишвар аз соати 20-00 то 22-00 такроран ироаи паёми президент ба парлумонро намоиш дода, дар ин вақт ба минтақаҳо мутобиқи лимити муқарраршуда барқ дода мешавад.
Ёдрас мекунем, ки тамоми шабакаҳои марказии телевизиони давлатӣ ва радиои Тоҷикистон маросими ироаи паёми президенти мамлакат Эмомалӣ Раҳмон ба парлумонро мустақиман пахш хоҳанд кард.
